Dikur ishin të parat në skenë apo pasarelë, ndërsa sot mund t’i shohim të postojnë vetëm foto nga jeta që bëjnë si të martuara, larg vëmendjes publike. Nga modelja Angela Martini te prezantuesja Marina Vjollca, duket se jeta u ka ndryshuar kryekëput pas martesave, e para më milionerin rumun Dragos Savulescu dhe e dyta me CEO-n e “Babastars”, Getoar Selimi.
Nuk kanë qenë të rralla rastet kur modelja e njohur shqiptare tregon jetën prej “shtëpiakeje”, të cilat filluan direkt pas martesës në Shtetet e Bashkuara të Amerikës dhe kthimit në shtëpinë që kanë në Rumani pas muajit luksoz të mjaltit.
Angela provokoi ndjekësit fillimisht teksa pozonte në një divan dhe krah fotos ku shkruante: “Thjesht jam një shtëpiake, pres që bashkëshorti im të vijë dhe të flasim për alienët, Zotin etj.. Thjesht gjëra të zakonshme”.
Me anë të kësaj poze, Angela nënkuptonte se martesa e saj ka shumë pasion dhe dashuri, duke qenë se ai është milioner dhe nuk i mungon asgjë. Më vonë, ajo postoi të tjera foto nga shtëpia e tyre luksoze, ku në një prej tyre shprehu mërzinë e madhe nga të qenurit amvisë shtëpie, pasi shfaqej duke gatuar.
Supermodelja e pasarelave hoqi dorë nga karriera pas martesës, duke u shfaqur kësaj here në fotografi në rolin e një shtëpiakeje të mërzitur e të zemëruar me jetën e mbyllur, pasi kalon tërë kohën në kuzhinë. “E lodhur, duke punuar në kuzhinë”, shkruante Martini, e veshur në një palë të brendshme me dantellë, nga të cilat nuk heq dorë kurrë.
Të njëjtin stil jete si “shtëpiake e dëshpëruar” ka deklaruar vetë edhe Marina Vjollca, që nga koha kur “ Tv Klan” nuk po e angazhon me asnjë projekt televiziv. Për disa javë prezantoi emisionin “C`est la vie” dhe më pas nuk e pamë më në ekran Marinën, kështu, për momentin mund të themi se Marina është kthyer vërtet në një “shtëpiake”.
E dëshpëruar ose jo, ajo ka filluar të bëjë dhe ‘meme’ me veten e saj. Marina ka postuar në “Instastory” një video, ku shihej një mace në robdëshamber dhe me një palë shapka banje, teksa relaksohet në shtëpi.
Kjo, mesa duket, i përshtatet fiks Marinës, e cila këtë video e ka shoqëruar me mbishkrimin “Unë në shtëpi”. Po ashtu dhe Ornela Bregu është një tjetër prezantuese, e cila është larguar jo vetëm nga skena, por edhe nga Shqipëria.
Pas eksperiencës së fundit si prezantuese e “E diell” me Alban Dudushin, Ornela është vendosur në Spanjë, ku jeton me familjen larg famës. Gjithsesi, Ornela është mjaft aktive në rrjetet sociale për jetën që bën atje. Vitin e kaluar ajo ndau me ndjekësit momente nga dhuratat që iu bënë për 40-vjetor në Spanjë.
Ledina Çelo është një tjetër këngëtare, e cila pas një karriere të gjatë po shijon jetën si familjare në Gjermani me Naim Kabashin, ish-kampionin shqiptar nga Kosova të kick box-it. Nëna e djalit Erlis dhe vajzës Periana, poston shpesh foto pranë fëmijëve, ku duket një amvisë e përkushtuar totalisht te familja dhe puna në biznesin e bashkëshortit. Këngëtarja ka rrëfyer dhe detaje nga takimi i parë me vjehrrën si nuse Kosove që është.
“Shoqja ime më tha: ‘Ledinë, je bërë nuse Kosove, tani do të pastrosh oborrin, do t’i bësh kafe vjehrrës që me mëngjes…’ por do ti, ndodhi e kundërta? Kam edhe dy kunata shumë të mira dhe kur shkoj atje ndihem si një princeshë”, ka rrëfyer ajo.
Kujtojmë që Ledina u rikthye për pak në skenën shqiptare si prezantuese e Festivalit të Këngës në RTSH. E njëjta gjë ka ndodhur edhe me Afërdita Dreshaj, që nga martesa qershorin e vitit të kaluar në Miami të SHBAve me hokeistin çek Jakub Kindl. Pas martesës, modelja, e cila nuk vazhdon më karrierën, të vetmin lajm që dha për jetën e saj është blerja e një shtëpie të re, që do e shijojë në maksimum tani si e martuar.
Një tjetër personazh që po bën pauzë pas eksperiencës si prezantuese e “Dancing with the stars” është ish-Miss Shqipëria, Almeda Abazi. Pas martesës me Tolgahan Sayisman ajo po shijon relaksin në shtëpinë e tyre luksoze në Stamboll në pritje të lindjes së fëmijës së tyre të parë.
Po ashtu martesa, u ndryshoi jetën Jona Spahiut nga martesa me Frenkli Ymerin dhe ish-Sofisë së Arian Çanit, e cila tashmë është tërhequr nga televizioni për t’iu përkushtuar familjes së re dhe fëmijës.
PANORAMA PLUS
