Policia italiane ka zbardhur detaje të reja lidhur me një bandë shqiptare të specializuar në grabitje, e cila dyshohet se ka kryer 19 vjedhje në zonat e Modenës, Reggio Emilias dhe Bolonjës brenda një periudhe prej vetëm tetë ditësh.
Nga hetimet rezulton se dy shqiptarët e arrestuar, të moshës 37 dhe 40 vjeç, kanë shkaktuar një dëm që arrin vlerën e 400 mijë eurove. Kjo do të thotë një mesatare prej 50 mijë eurosh në ditë. Policia ka nisur kërkimet për persona të tjerë të përfshirë në këtë seri vjedhjesh.
Grabitjet janë kryer midis 29 tetorit dhe 5 nëntorit, ndërsa operacioni për kapjen e autorëve përfundoi më 26 nëntor, pas një sërë ankesash nga banorët. Banda përdorte pajisje të specializuara për të hapur dyer dhe dritare dhe vepronte me një strategji të mirëpërcaktuar, duke kryer bastisje nga ora 17:00 deri në 22:00.
Njëri nga të arrestuarit rezultoi të ishte në territorin italian në mënyrë të paligjshme dhe kishte precedentë penalë, përfshirë një dënim me 1 vit e 1 muaj burg për plagosje. Një pjesë e sendeve të vjedhura do t’u kthehet pronarëve, ndërsa hetimet për të zbuluar të gjithë pjesëtarët e bandës vijojnë.
/a.r
