Një tjetër sukses për Era Istrefin,pasi të nominohet në kompeticionin ndërkombëtar “Break Tudo Awards”. Viti 2018 ka qenë pa diskutim një prej më të suksesshmëve për këngëtaren shqiptare Era Istrefi. Ajo ishte një nga tre zërat interpretues të himnit të Kampionatit Botëror, që këtë vit u mbajt në Rusi.
“Live it up” është kënga, e cila e bëri të dëgjuar artisten kosovare në mbarë botën, së bashku me Will Smith dhe Nicky Jam.
Më pas, erdhi radha e dy këngëve tjera “Prisioner” dhe “Oh God”, të cilat gjithashtu u pritën mirë nga fansat e saj.
Këngëtarja Istrefi së fundmi ka shënuar edhe një tjetër sukses, duke arritur të nominohet për çmimet “BreakTudo Awards 2018” në kategorinë e “International New Artist” (Artisti i ri ndërkombëtar).Konkurrencën e këngëtares nga Kosova në këtë kategori e ka bërë publike edhe faqja zyrtare e këtij kompeticioni, në të cilin garojnë emra të njohur ndërkombëtarë.
Votimet në faqen zyrtare të “BreakTudo Awards” zgjasin deri në datën 15 tetor, përgatiti ”Telegrafi”. (b.an)
