Ish-kandidati republikan për president të Shteteve të Bashkuara të Amerikës më 2008, John McCain, e ka paralajmëruar presidentin e zgjedhur amerikan, Donald Trump, që të mos i besojë presidentit të Rusisë, Vladimir Putin.
“Teksa ka nisur transicioni presidencial në SHBA, Putin ka thënë në ditët e fundit se ai dëshiron t’i përmirësojë marrëdhëniet me Shtetet e Bashkuara”, ka thënë McCain, një prej figurave më të larta të Partisë Republikane, nëpërmjet një komunikate, raporton Business Insider.
“Ne duhet t’iu besojmë këtyre deklaratave po aq sa deklaratave të tjera të bëra nga ish-agjenti i KGB’së, i cili e ka zhytur vendin e tij në tirani, ka vrarë kundërshtarët e tij politikë, ka pushtuar fqinjët e tij, ka kërcënuar aleatët e Amerikës, dhe është munduar t’i manipulojë zgjedhjet e Amerikës”, është shprehur McCain, senator nga Arizona, transmeton Gazeta Express.
Putin është rreshtuar përkrah presidentit sirian, Bashar al-Assad, “në një luftë barbarike kundër popullit sirian”, ka kujtuar McCain.
“Përpjekja e fundit e administratës Obama për ‘rifillim’ të marrëdhënieve me Rusinë ka kulmuar me pushtimin e Ukrainës nga Putin, dhe me ndërhyrje ushtarake në Lindjen e Mesme”, ka thënë McCain.
Figura e lartë ka paralajmëruar se “çmimi i një ‘rifillimi’ tjetër do të ishte, më së paku, marrje e bashkëfajësisë në masakrimin që Putin dhe Assad po i bëjnë popullit sirian”, transmeton Gazeta Express.
Sipas tij, “ky është një çmim i papranueshëm për një komb të madh. Amerika ka qenë në kulmin e madhështisë kur ka qëndruar në anën e luftëtarëve të tiranisë”.
Amerika duhet të qëndrojë përsëri në këtë anë, ka porositur McCain presidentin e zgjedhur amerikan.
Trump do të bëjë betimin si president i 45’të i Shteteve të Bashkuara të Amerikës në janarin e vitit të ardhshëm, citohet ”Express”. (b.an)
