Bashkia e Tiranës ka njoftuar devijimin e qarkullimit nga sheshi “Skënderbej” për shkak të punimeve që po kryhen. Në njoftimin e shpërndarë për mediat bashkia sqaron akset të cilat do të bllokohen.
Njoftimi:
Duke qenë se Bashkia e Tiranës po vijon punën për zbatimin e projektit të “Sheshit Skënderbej”, për të përfunduar fazën e II të punimeve, nga dita e Shtunë (dt. 29 Tetor) e në vijim, lind nevoja që trafiku i automjeteve të devijohet sipas përshkrimit më poshtë:
“Qarkullimi i automjeteve dhe mjeteve të transportit urban në sheshin “Skënderbej” pjesa lindore në rrugën “e Dibrës”, drejtimi lëvizjes Lindje-Perëndim, do të devijohet vetëm djathtas në kryqëzimin me Bulevardin ‘Zogu I'”.
Paralelisht, Bashkia e Tiranës, në bashkëpunim me OSHEE-në, po punojnë për zhvendosjen e nënstacionit elektrik, i cili do t’i hapë rrugën ndërtimit të Unazës së Vogël, çka më pas do të sillte edhe një qarkullim më të lehtësuar të automjeteve në qendër të Tiranës. Gjithashtu, punimet për realizimin e projektit të “Sheshit Skënderbej” pritet të përfundojnë në verën e vitit 2017.
