Statuja e një nga figurave më të rëndësishme të popullit shqiptar Nënës Terezë që nga nesër do të jetë prezent edhe në Gjermani, raporton Koha.net.
E derdhur në bronz nga artisti mitrovicas, Miftar Istrefi i njohur si “Tali”, statuja e Nënë Terezës nesër (të shtunën) do të vendoset në oborrin e katedrales Johannes Baptist në Mynih.
Këtë e ka bërë të ditur për Koha.net Miftar Istrefi, i cili është shprehur se kjo ka një rëndësi shumë të madhe për të si artist, por edhe për popullin shqiptar për shkak se Nëna Terezë është një figurë e paqes dhe dashurisë.
“Vet fakti se është figura e Nënë Terezës ka rëndësi, jo vetëm për mua, por edhe për gjithë kombin shqiptar sepse ajo është një figurë e paqes dhe dashurisë”, është shprehur Tali.
Më 13 shtator një bust i saj, i punuar nga Tali, ishte vendosur në Toronto, Kanada. (b.an)
