Pas vendimit për të bojkotuar për 10 ditë kuvendin, lideri i opozitës Lulzim Basha e ka cilësuar dënimin me 10 ditë përjashtim kundrejt Sali Berishës si përpjekjen e qeverisë për t’i dhënë gajret Emiliano Shullazit. Basha e ka quajtur vëndimin e Byrosë për përjashtimin e ish kryeministrit pa bazë dhe argumenta, duke shtuar se Rama po bën avokatin e Emiliano Shullazit.
“Vendimi për përjashtimin e Berishës u mor me shpresën se me një vendim të tillë do sfumohej debati publik, që po rritet mbi shtetin e Ramës që është shteti i Shullazit, gjithçka është në dispozicion të banditëve, që diktojnë vendimet politike për të marrë pasuritë e shqiptarëve, për ti shpëtuar ligjit dhe ndjekjes penale. Ne inkurajojmë hetimin, prokurorët me integritet, që shënuan pikë kthese me arrestimin e Shullazit dhe bandës së tij, ndjekim cdo hap që Rama po hedh për t’i dhënë gajret bandës, si ishte dënimi i Berishës pa bazë ligjore, apo qëndrimi i Ramës të premten ku me një logore të gjatë e të zvarritur, bëri avokatinë e Shullazit dhe bandës së tij”- deklaroi Basha.
…………..
Partia Demokratike pritet të bojkotojë Kuvendin për 10 ditë, aq sa është edhe vendimi i marrë nga Byroja e Kuvendit, për të përjashtuar për 10 ditë Berishën pas thirrjeve të tij në Kuvend për armatosje të popullatës. Ky vendim po diskutohet në mbledhjen e grupit parlamentarë të PD-së, i cili po zhvillohet në këto momente pa praninë e medias.
Vendimi për bojkot nuk përbënte ndonjë suprizë po të kihet parasysh se ditën e vendimit të Byrosë së Kuvendit për përjashtim të Berishës për 10 ditë nga Kuvendi, PD-ja paralajmëroi masa të ashpra nëse Byroja nuk tërhiqet nga vendimi i marrë. Ish kryeministri, Sali Berisha, bëri thirrje nga foltorja e Kuvendit, për armatosje të popullatës, një thirrje kjo që bie ndesh me nenin 222 të Kodit Penal të Republikës së Shqipërisë.
Disa deputetë të PD-së u përpoqën më pas ta modifikonin thirrjen e tij me arësyetim se kështu është ligji dhe në SHBA, por gjerësisht thirrja e tij u vlerësua se bie në kundërshtim me ligjet shqiptare.
FJALA E PLOTE E LULZIM BASHES
Në shenjë proteste ndaj një vendimi të padrejtë, të pambështetur dhe të paargumentuar në ligj dhe në rregullore, Grupi Parlamentar vendosi bojkot të plotë dhe të gjithanshëm të gjithë aktivitetit parlamentar gjatë kësaj jave. Një vendim që u mor si hakmarrje e Edi Ramës për denoncimin e aferës së Shullazit, megaskandalit të shtetit “Rama-Shullazi” me shpresën se përmes një vendimi të tillë do të sfumojë dhe debatin publik i cili po rritet nga dita në ditë, po zmadhohet, po forcohet mbi shtetin e Edi Ramës që rezulton të jetë shteti i Emiliano Shullazit. Shteti i banditit dhe banditëve, ku çdo zyrë duke filluar nga zyra kryeministrore, zyra e ministrit të Brendshëm dhe zyra të tjera të shtetit, hipotekat, doganat, policia janë në dispozicion të banditëve. Të banditëve që sot terrorizojnë jo vetëm biznesin, qytetarët por kanë guximin të diktojnë vendimet politike për të marrë pasuritë e shqiptarëve, për të grabitur pasuritë e shqiptarëve, e për të mos u përgjigjur para ligjit dhe për t’i shpëtuar ligjit dhe ndjekjes penale.
Nga njëra anë ne do të vazhdojmë të inkurajojmë hetimin e kësaj çështje, prokurorët me integritet të cilët përkundër gjithë shanseve në këto dy vite e gjysëm për një hetim të pavarur të krimit të organizuar me lidhje qeveritare kanë shënuar një pikë kthese me arrestimin e Emiliano Shullazit dhe disa prej anëtarëve të bandës së tij.
Por nga ana tjetër po ndjekim dhe do të ndjekim me vëmendje të madhe bashkë me qytetarët tanë, bashkë me partnerët ndërkombëtarë çdo hap që qeveria e Edi Ramës dhe Edi Rama personalisht po hedhin për t’i dhënë gajret bandës. Siç është dënimi i Sali Berishës pa asnjë bazë ligjore, pa asnjë argument, apo qëndrimi i pafalshëm i Edi Ramës të premten ku në një logore të gjatë e të zvarritur, me zë të dridhur u mundua të bëj avokatinë e Emiliano Shullazit dhe bandës së tij.
Është pozicionuar qartë kjo qeveri, ka vendosur të jetë deri në fund avokate e Emiliano Shullazit. Frytet e para të kësaj avokatie janë kërcënimi i disa prej dëshmitarëve me shpresën se ata do të tërhiqen nga një proces i cili i përfunduar me sukses do të shohë para drejtësisë jo vetëm Emilianon por edhe emilianot e tjerë në qeveri.
Partia Demokratike do të bëjë gjithçka në rrugë institucionale e politike dhe në bashkëpunim me qytetarët shqiptarë dhe me faktorin ndërkombëtar që kjo të mos ndodhë dhe e kundërta të ndodh. Që kjo pikë kthesë të shndërrohet në aktin e parë të reformës në drejtësi, të hedhë poshtë çdo logore, çdo përbaljtje dhe të nxjerrë përpara shqiptarëve hapur se përse për dy vite e gjysëm Edi Rama e vonoi reformën në drejtësi. Pikërisht që të mos ndodhte kjo që ka ndodhur, dhe se si ai po përpiqet me të gjitha forcat dhe mënyrat, jo vetëm të devijojë diskursin publik nga ky skandal që ka nxjerrë zbuluar shtetin e Edi Ramës, shtetin e Shullazit, shtetin e krimit dhe korrupsionit, por po kështu të shpëtojë bandat dhe banditët me të njëjtat mënyra dhe forma siç ka vepruar për të shpëtuar zyrtarët e tij të korruptuar.
Siç ka vepruar për të shpëtuar po këta në rastet e konfrontimit me armë në qendër të Tiranës apo anembanë Shqipërisë. Siç ka bërë dhe siç bën për të mbrojtur rrethin e tij të ngushtë të oligarkëve dhe kriminelëve me të cilët keqqeveris Shqipërinë prej tre vitesh tashmë, dhe tek të cilët ka vënë bastin për të mbajtur me çdo kusht pushtetin e tij të inkriminuar dhe të korruptuar. Bast i cili është vënë përballë gjithë shqiptarëve të ndershëm demokratë dhe socialistë, jo vetëm para opozitës, është vënë edhe para Bashkimit Europian dhe Shteteve të Bashkuara të Amerikës. Ky është Edi Rama. Emiliano Shullazi është faqja tjetër e medaljes së qeverisjes së Edi Ramës. Opozita e ka thënë këtë e ka argumentuar, ka luftuar dhe sot është më e vendosur se kurrë ta çojë këtë betejë deri në fund, deri në fitore se fund tjetër nuk mund të ketë për vendin, bashkë me qytetarët shqiptarë, bashkë me partnerët ndërkombëtarë.
