Adelajda Dybeli dhe Enea Nazaj janë dy nga studentët e vitit të parë në Akademinë e Forcave të Armatosura, të cilët kanë vendosur të zgjedhin shkollimin me fokusin në degë për të cilat Ministria e Mbrojtjes garanton mbështetje të vazhdueshme.
Ministri i Mbrojtjes, Pirro Vengu ndau një video ku dy të rinjtë studentë ndajnë emocionet dhe ambiciet e tyre në prag të nisjes së vitit të ri akademik duke parë nga e ardhmja.
Avantazhet e këtij shkollimi janë tarifa pa pagesë, strehimi dhe siguria e karrierës pas studimeve .
Studentja Adelajda Dybeli thekson se, “jam studente e vitit të parë në degë IT, në programin 4 vjeçar. Ishte një eksperiencë ndryshe nga ato që kisha provuar më përpara. Kishte normalisht shumë sfida, ama me kurajë dhe vullnet mund të arrihet çdo gjë. Nuk është e lehtë, në fillim normalisht që ka vështirësitë e veta, deri sa të njihemi me rregullat. Më pëlqen fryma e bashkëpunimit. Ndryshe nga çfarë jemi mësuar më përpara, këtu detaji kryesor dhe më i rëndësishëm është bashkëpunimi”.
Ndërsa studenti Enea Nazaj shprehet se, “kur mora informacionin për AFA-n më erdhi një energji pozitive për arsyen sepse çdo gjë ishte ndryshe, një eksperiencë e re dhe çdo gjë tjetër mu duk ndryshe nga Universitetet e tjera. I kam arritur pritshmëritë deri në fazën që flas që jam student i vitit të dytë. Më pas kam edhe dy vite të tjera studime në AFA, por deri tani janë pritshmëritë në maksimum. Dua ta shoh veten sa më lart me grada, me karakter, në drejtim, në çdo aspekt, dua që të arrij maksimumin, por asnjëherë nuk ka fund”.
Vengu bëri të ditur se, viti i ardhshëm në AFA sjell një tjetër lajm pozitiv që lidhet me modernizimin e që nxit investimet në kapitalin tonë njerëzor. Akademia do të zhvendoset në Kampusin e ri modern, duke krijuar liderët e ardhshëm të Forcave të Armatosura.
