Një gjykatë turke ka dënuar me burg prej gati 250 vitesh 37 persona të dënuar për spiunazh për Mossad, shërbimin e jashtëm të inteligjencës izraelite , sipas një dokumenti gjyqësor të parë nga The National.
Dënimet vijnë pasi Turqia thotë se po “përndjek” agjentët e Mossad-it në vend mes një rënieje të madhe në marrëdhëniet e saj me Izraelin, të shkaktuar nga pikëpamjet e kundërta për luftën në Gaza.
Ahmet Koray Ozgurun dhe Alperen Erkut u dënuan këtë javë secili me nga tetë vjet e një muaj për “marrje informacioni të ndaluar me qëllim spiunazhi”, sipas një liste akuzash nga Gjykata e Lartë Penale e Stambollit. Ata kanë të drejtë ankimimi dhe koha e kaluar në paraburgim do t’u zbritet nga dënimi.
Tridhjetë e pesë të tjerë u dënuan me gjashtë vjet e tetë muaj burg për të njëjtën akuzë, thuhej në dokument. Dënimet e shtuara nënkuptojnë se të dënuarit do të kalojnë kolektivisht rreth 250 vjet pas hekurave – një shenjë se sa seriozisht po e merr Turqia spiunazhin në tokën e saj.
Muajin e kaluar, Turqia pretendoi se kishte arrestuar financierin kryesor të Mossad në vend. Liridon Rexhepi, një shtetas kosovar, hyri në Turqi më 25 gusht dhe u arrestua pesë ditë më vonë në Stamboll nga një njësi kundër terrorizmit, pas punës së shërbimit të inteligjencës turke MIT.
Në atë kohë, një burim turk i sigurisë konfirmoi për The National se Rexhepi ishte akuzuar për “spiunazh kundër shtetit”, pasi autoritetet arritën në përfundimin se ai u transferonte para agjentëve në terren të Mossad në Turqi, të cilët po operonin me drone, duke kryer “operacione psikologjike” kundër politikanëve palestinezë dhe përpilimi i informacionit për Sirinë për Izraelin.
Marrëdhëniet midis Turqisë dhe Izraelit janë përkeqësuar në mënyrë dramatike që nga sulmet e 7 tetorit nga Hamas në Izraelin jugor, të cilat vranë rreth 1200 njerëz dhe çuan në luftën në Gaza. Presidenti Rexhep Tajip Erdogan dhe udhëheqës të tjerë turq kanë shprehur mbështetje për Hamasin dhe kanë kritikuar sjelljen e Izraelit në operacionet e tij ushtarake, të cilat kanë vrarë më shumë se 41,000 njerëz në enklavën palestineze që nga fillimi i luftës.
/a.r
