Tërmeti i fortë i së dielës mbrëma në verilindje të vendit është “paralajmëruar”, katër ditë më parë. Të premten mbrëma lëkundje me magnitutë 3.2 të shkallës Rihter u regjistruan në Klos.
Dridhjet e nëntokës kanë vijuar me magnitutë të ulët përgjatë fundjavës derisa mbrëmjen e së dielës u regjistrua goditja e fortë me maginitutë 4,7 të shkallës Rihter.
Disa minuta më pas u regjistrua një tërmet me magnitutë 4,1 të shkallës Rihter dhe pasgoditjet në vatrën në verilindje të vendit vijojnë.
Mëngjesin e së hënës u regjistruan dridhje të tokës me magnitutë 3.2 dhe siç ndodh kryesisht mund të vijojnë derisa aktiviteti sizmik në zonë të shkojë drejt shuarjes.
Të dhënat nga Qendra Sizmologjike Europiano-Mesdhetare tregojnë se lëkundje të lehta të tokës janë regjistruar ditëve të fundit edhe në Maqedoninë e Veriut, në Mal të Zi, në Greqi, në Adriatik e në Turqi.
Sipas Ministrisë së Mbrojtjes, tërmeti i së dielës mbrëma ka shkaktuar dëme të lehta vetëm në Xibër të bashkisë Klos.
/a.r
