Vazhdimi i zgjerimit të Bashkimit Evropian është në interesin tonë dhe gjithashtu një detyrë morale, tha ish-përfaqësuesja e lartë e BE-së, Federica Mogherini.
“Ndjekja e zgjerimit dhe përfshirja e Ballkanit Perëndimor, vende që tashmë janë pjesë e kontinentit evropian, është një ribashkim më shumë sesa një zgjerim”, theksoi Mogherini.
Ajo vuri në dukje gjithashtu se një tjetër nga elementët në diskutim në lidhje me të ardhmen e Evropës është edhe zhvillimi i një mbrojtjeje evropiane, e lindur nga pasiguritë dhe trazirat për të ardhmen e NATO-s.
“Unë besoj se do të ishte shumë e rëndësishme të rifillonte diskursi i politikës evropiane të mbrojtjes dhe të gjendeshin burime financiare dhe kapital politik, jo në kundërshtim me NATO-n, por, përkundrazi, për të forcuar NATO-n dhe qëllimet e saj “, shtoi ajo.
Rektorja e Kolegjit të Evropës foli gjatë panelit të katërt të qytetarëve në Konferencën për të Ardhmen e Evropës, i kushtuar politikës së jashtme të BE-së.
/b.h
