Këngëtarja Alida Hisku ka rrëfyer në në një intervistë se kanë qenë tre artistë vlonjatë që e kanë spiunuar te sigurimi i shtetit.
Në intervistën e saj për “Shqiptarja.com”, Hisku tregon se tre vlonjatët çuan ditarin e saj në duart e Sigurimit.
“Në atë kohë unë studioja në vitin e fundit për shkenca politike në institutin “Vladimir I. Lenin”. Kisha bërë edhe stazhin e partisë. Sapo isha bërë edhe anëtare e Partisë. Kur më arrestuan, babai im ishte ende sekretar partie”.
Në shtypshkronjë ai njihej si njeriu më i drejtë që besonte në idealin e Partisë. Ka vajtur në prokurori dhe ka dorëzuar teserën e partisë”.
Babai u tha: “Unë po ua jap teserën, por vajza ime nuk e meriton të shkojë atje ku e keni çuar ju…”.
“Unë besoja te vetja, punoja fort. Arritjet e mia rrodhën natyrshëm. Këto arritje mbase u vranë sytë atyre që ma bën këtë, që më kallëzuan se çfarë shkruaja në një ditar që e kisha shumë personal”, thotë këngëtarja.
“Mbase u vrau sytë gjithë kjo arritje, siç konsiderohej në atë kohë. Ishin tre vetë ata që ma bënë këtë. Kanë qenë nga Vlora, tre artistë që ishin në Shkollën e Partisë”.
Para disa javësh, Alida Hisku hapi një debat të madh, që ende vazhdon, me pretendimin se është përdhunuar në qeli gjatë kohës që merrej në pyetje nga hetuesia.
