Në Teksas të Shteteve të Bashkuara, nëntë persona u vranë dhe të paktën shtatë u plagosën kur një person me veshje ushtarake hapi zjarr në një dyqan në Allen, rreth 40 kilometra nga Dallasi. Ai qëlloi drejt turmës, përpara se të ekzekutohej nga një oficer policie. Dyshohet se mes viktimave ka edhe fëmijë.
Një tjetër episod i çmendurisë me armë u regjistrua rreth orës 15:30 të së shtunës, gjatë asaj që dukej si një pasdite tipike blerjesh në qendrën tregtare Allen Premium Outlets. Mijëra njerëz lëviznin mes më shumë se njëqind dyqaneve, të pavetëdijshëm për makthin që do të përjetonin brenda pak minutash. Dëshmitarët thanë se papritmas dëgjuan një zhurmë të fortë armësh, midis 14 dhe 60 të shtënave e pastaj vetëm kaos.
Ndërhyrja në kohë e policisë bëri të mundur shmangien e një bilanci edhe më të rëndë viktimash. Për momentin nuk dihen arsyet e masakrës. Një dëshmitar u shpreh:
Agresori mbante veshur një jelek dhe dukej qartazi se ishte i trajnuar. Ai e dinte se çfarë po bënte.
Një video tronditëse që qarkullon në Twitter e tregon autorin të veshur me një kostum të errët, duke zbritur nga një makinë gri, në parkingun e qendrës tregtare dhe qëllon mbi njerëzit. Imazhet janë të paqarta e në distancë, por zhurma e armëve dëgjohet mirë.
Po në Amerikë, këtë fundjavë në Kaliforni, një vajzë 17-vjeçare u vra dhe pesë djem të moshave nga 18 në 21 vjeç u plagosën nga të shtëna armësh, në një festë në Chico. Ka patur më shumë se 150 të shtëna masive në Shtetet e Bashkuara që nga fillimi i vitit 2023, sipas të dhënave nga organizata jofitimprurëse Gun Violence. Vitin e kaluar ishin 647, mesatarisht dy në ditë.
/s.f
