Çdo vit më 9 Maj, vendet europiane kremtojnë Ditën e Europës, një datë që simbolizon fillimin e bashkëpunimit dhe unitetit në kontinent pas Luftës së Dytë Botërore. Kjo ditë lidhet me Deklaratën Schuman, të shpallur më 9 maj 1950 nga ministri i Jashtëm francez Robert Schuman.
Në deklaratën e tij historike, Schuman propozoi vendosjen e prodhimit të qymyrit dhe çelikut të Francës dhe Gjermanisë nën një autoritet të përbashkët, me synimin për të shmangur konfliktet e ardhshme dhe për të ndërtuar paqe të qëndrueshme në Europë. Ky propozim u bë themeli i krijimit të Komunitetit Europian të Qymyrit dhe Çelikut, i cili më vonë do të shndërrohej në Bashkimin Europian.
Pas dy luftërave botërore që shkatërruan kontinentin, 9 Maji u kthye në simbol të pajtimit, solidaritetit dhe bashkëpunimit mes popujve europianë. Në vitin 1985, liderët europianë vendosën zyrtarisht që kjo datë të festohej si Dita e Europës.
Sot, Dita e Europës përkujtohet me aktivitete kulturore, ceremoniale dhe mesazhe për paqen, demokracinë dhe integrimin europian, jo vetëm në vendet anëtare të BE-së, por edhe në vendet aspirante si Shqipëria.
