Në 16 Dhjetor 2022, emisioni investigativ “Stop” në Tv Klan transmetoi problemin e Petref Hykës, ish-shofer autobusi në Parkun e Autobusëve të udhëtarëve, në varësi të Bashkisë Tiranë.
Në vitin 2013, kryetari i kohës i Bashkisë, Lulzim Basha pushoi Petrefin dhe 70 shoferë të vjetër, duke i zëvendësuar me rinj pa njoftim dhe pa arsye. Petrefi iu drejtua Bashkisë, Avokatit të Popullit dhe Gjykatës, e cila i njohu të drejtën e dëmshpërblimit.
Tani Petrefit i takojnë rreth 5 milionë Lekë që nga viti 2015, të cilat nuk ia japin. Përmbaruesi Ekrem Spahiu, ka kryer të gjithë procedurën, por Bashkia nuk i bindet këtij vendimi gjykate, sepse luan me emrin e paditësit Park autobuzash-Bashki.
Gazetarja bashkë me qytetarin iu drejtuan Bashkisë Tiranë, zyrës juridike, ku nga 10 shkresa që kishte bërë qytetari më parë bashkë me gazetaren, bënë të 11-ën.
19 DHJETOR 2022:
Denoncuesi: Kam punuar 10 vjet në Parkun e Autobusave Kinostudio-Kombinat si shofer. Në 2013-ën me ardhjen e autobusave të rinj, 70 shofera dhe fatorino nuk i morën më në punë. Kryetar bashkie në atë kohë ishte Lulzim Basha.
Gazetarja: T’u dhanë këto pagesat që ti kishe për të marrë?
Denoncuesi: Jo. Që nga 2015 e deri këtej, ne nuk kemi marrë asnjë Lekë.
Pas interesimit të herë pas hershëm të “Stop”, më në fund Bashkia Tiranë kthen përgjigje duke premtuar se do të merret me rastin shumë shpejt që të ekzekutohet vendimi i gjykatës dhe Petref Hyka të marrë paratë që i takojnë.
Gazetarja: Sipas kësaj kthim-përgjigje, Bashkia e Tiranës është duke u futur në rrugë të problematikës. Janë në fazën e marrjes së një vendimi, por se çfarë vendimi do të merret në fund…
Denoncuesi: Ju lutem shumë na jepni Lekët sepse shoferët kanë qenë të vjetër dhe janë gati 15 shofera që kanë vdekur deri tani nga 2013. Lali na e zgjidh këtë problem se është gjynah. Na jepni lekët sa jemi këtu, t’i hamë o burrë i dheut.
/a.d
