JAVANEWS/ Ishte 27 janar 1945. Plot 71 vjet më parë, ushtarët e Armatës së 60-të ukrainase të Ushtrisë së Kuqe sovjetike hapën kangjellat e kampit të shfarosjes Auschwitz-Birkenau, i cili ishte bërë simboli i Holokaustit.
Kapiteni Aleksander Vorontsov fiksoi në fotografi pamjet e tmerrshme të kampit famëkeq.
Kur u hapën portat e kampit, nazistët kishin ikur që aty. Midis 8 dhe 26 janarit kishin hedhur në erë krematorët, dhomat e gazit, kishin djegur dokumentet që vërtetonin krimet e kryera, raportet e torturave dhe eksperimentet mjekësore me burrat, gratë e fëmijët.
Në kampin kryesor kishin mbetur ende rreth shtatë mijë të burgosur. Ishin më të dobëtit, të pamundur për të bërë “marshimin e vdekjes” drejt perëndimit.
Kur hynë në kamp, ushtarët e Ushtrisë së Kuqe gjetën rreth 600 të burgosur të vrarë nga trupat SS gjatë ikjes ose të vdekur.
Sovjetikët ngritën menjëherë spitalin e urgjencës të drejtuar nga kolonelët Vejkov e Melaj, ku shtruan qindra të burgosur, të cilët ishin në gjendje të rëndë, të ndihmuar edhe nga dhjetëra vullnetarë polakë nga fshati Oswieçim aty pranë.
Midis të shtruarve ishin edhe 400 fëmijë, viktima, përveç urisë dhe kushteve të tmerrshme higjienike, edhe të eksperimenteve të mjekut SS Josef Mengele.
Në ditët në vazhdim, trupat sovjetike sollën aty qytetarë gjermanë për të parë me sytë e tyre se çfarë ndodhte në kampet e vdekjes të ngritur nga regjimi nazist.
JAVANEWS
