Në pamje të parë, Albinen duket si një fshat malor nga ndonjë album fotografish. Ai gjendet në një lartësi prej 1300 metrash, dhe shtrihet në një shpat malor që e rreh dielli. Problemi është se në këtë fshat jetojnë sot vetëm 241 vetë, dhe vetëm 25 janë nën 20 vjeç
Për këtë arsye banorët e këtij fshati kanë nisur një nismë për të thithur banorë të rinj dhe kërkojnë që për këtë të zhvillohet një referendum. Sipas banorëve të fshatit ata që vijnë të jetojnë në këtë fshat marrin një shpërblim në të holla. Kështu një familje prej 4 persona mund të marrë deri në 70.000 franga (rreth 60.000 euro). Për këtë nismë pritet të votohet në një referendum.
Ky lajm mori dhenë nga SHBA-ja në Meksikë, Spanjë, Kroaci, Vietnam e deri në Kinë. Pasi disa media shkruan për këtë ide, komuna e fshatit u bombardua prej rreth 3000 kërkesash me e-mail, sms, whatsapp apo facebook, tregon kryetari i komunës Beat Jost.
Dezinformim mediatik
Problemi në të gjithë këtë histori është se mediet e kanë pasqyruar projektin tonë në mënyrë të shtrembëruar, thotë Beat Jost, i cili është vetë gazetar. Kjo ka bërë që shumë njerëz që janë në kërkim të një perspektive të re jetese, të ëndërrojnë për të ardhur në fshatin tonë. Por fjala është për një nismë, e cila ende nuk është aprovuar nga referendumi. Po ashtu në media nuk është shkruar as edhe shpërblimi lidhet me kushte te caktuara, kështu kush do të vijë duhet të jetë nën 45 vjeç.
Po ashtu ata që përzgjidhen duhet të jetojnë të paktën 10 vjet në Albinen, ndryshe duhet ta kthejnë shpërblimin dhe të investojnë në fshat të paktën 200.000 franga (rreth 170.000 euro). Po ashtu duhet që të huajt që duan të vendosen në Albinen të kenë vizën C. Pra nga 3000 prej atyre që kanë bërë deri tani kërkesë askush nuk i plotëson kushtet.
a.ç
