Sot shënon 1 javë luftë në Ukrainë. Për të shtatën ditë, pushtimi rus i Ukrainës vazhdon me betejat në zhvillim në Kiev, Kharkov, Mariupol dhe qytete të tjera.
Ukraina raporton se ka ndodhur një sulm me raketa gjatë natës në qytetin Zhytomyr. BBC raporton se sulmi synonte bazën ajrore në qytet, mirëpo ka goditur edhe shtëpitë e banimit aty pranë, duke lënë pas viktima.
Ministria e Punëve të Brendshme të Ukrainës ka shkruar në Twitter se të paktën dy persona kanë humbur jetën dhe 16 të tjerë janë plagosur. Një zyrtar qeveritar, Anton Gerashchenko, tha në llogarinë e tij në Telegram se numri i të vdekurve mund të ishte edhe më i lartë.
“Deri më tani, katër persona kanë vdekur, duke përfshirë një fëmijë,” tha ai.
Sot do të zhvillohet raundi i dytë i bisedimeve ndërmjet delegacioneve nga Ukraina dhe Rusia për situatën.
Raundi i dytë i bisedimeve do të zhvillohet në Bjellorusi pranë kufirit Bjellorusi-Poloni. Anëtarët e parë të delegacioneve pritet të mbërrijnë në orët e para të mëngjesit në kryeqytetin e Bjellorusisë, Minsk. Raundi i parë i bisedimeve ndodhi ditën e hënë dhe zgjati për pesë orë dhe përfundoi pa ndonjë përparim. Nga ana e Ukrainës ende nuk ka një konfirmim nëse do të zhvillohen ose jo bisedimet.
Shpërthime dhe të shtëna me armë shpërthyen gjatë natës në lagjet e Kievit. Sipas CNN, dy ndërtesa banimi u sulmuan nga ajri në qytetin Borodjanka, 50 kilometra larg Kievit. Në të njëjtën kohë, sipas ushtrisë ukrainase, njësitë ajrore ruse pushtuan Kharkovin në mëngjes herët.
Më shumë se njëqind banorë të Mariupolit janë plagosur nga sulmet ajrore ruse, tha kryetari i bashkisë së qytetit, Vadim Boichenko. Sot në Mariupol pritet të nisë një operacion daljeje, pasi forcat ruse deklaruan se do të hapin një kalim të sigurt për dalje nga qyteti.
g.kosovari
