Mbi tri dekada që nga debakli që i shkaktoi Maltës në Sevilla për të siguruar papritur një vend në Kampionatin Evropian, Spanja është akuzuar nga Malta se lojtarët e saj përdorën doping në rrugën drejt fitores së famshme. Iu desh një fitore me 11 gola dallim ndaj Maltës për të siguruar biletën për në “Euro 1984”. Spanja shënoi në ndeshjen e fundit po aq sa kishte shënuar në gjithë ciklin eliminator, për të triumfuar 12:1 në përballjen e dhjetorit të vitit 1983.
Rezultati, që u vulos me një gol të vonshëm të shënuar nga Juan Antonio Senor, la Spanjën baras me pikë dhe golaverazh me Holandën në krye të Grupit 7 dhe “furia e kuqe” u kualifikua vetëm pasi kishte shënuar më tepër gola.
Duke folur në emisionin “Fiebre Maldini” në televizionin spanjoll, golashënuesi i Maltës në atë ndeshje, Silvio Demanuele, ka thënë: “Unë kam një vëlla që ishte bodibillder dhe e di se çfarë ndodh kur njerëzit marrin steroide. Energjia që spanjollët kishin atë natë nuk ishte normale. Disa prej tyre po shkumonin nga goja; po dilte lëngë nga goja e tyre dhe nuk po mund të ndalnin së piri ujë. E di se çfarë ndodh kur njerëzit marrin steroide”, shkruan AS, transmeton “Koha Ditore”.
Ndërkohë, trajneri i atëhershëm i Maltës, Victor Scerri, po ashtu ka folur për këtë ndeshje. Ai ka shprehur dyshimin se iu dha një substancë për të lodhur ata gjatë pauzës mes pjesë. “Një burrë shtatshkurtër me të verdha erdhi dhe na ofroi një shportë me limona të prerë”, rikujton Scerri. “Ishte gjëja e vetme që na u ofrua. Lojtarët i hëngrën ato dhe më pas u ndien keq. U pyeta: ‘A mendoni se janë droguar lojtarët?’
Nuk kemi ndonjë dëshmi; shpresoj që Spanja nuk ka bërë një gjë të tillë”. Demanuele ka shtuar: “Kur mora lëngun e limonit, u ndjeva si i dehur, sikur kam festuar gjithë natën”. Në Evropianin e vitit 1984, që u mbajt në Francë, Spanja arriti deri në finale. Në finalen e luajtur në Paris u mposht nga Franca me shifrat 2:0. (b.an)
