Kompania ‘3P Life Logistic’ duke reaguar ndaj deklaratës së deputetes së PD-së Albana Vokshi sqaron opinionin publik lidhur me keqinterpretimin e informacionit për transportin në një makinë të vetme të analizave të programit të kontrollit bazë të shqiptarëve dhe mbetjeve spitalore nga Tropoja.
Në një letër sqaruese drejtuar Ministrit të Shëndetësisë më dt. 25/03/2016, kompania sqaron të gjithë palët e interesuara se për Qarkun e Tropojës, ka të dedikuar Automjetin tip Ford Transit me targë AA 295 KS, të cilin e ka të regjistruar si asset të kompanisë pranë QKR-së që nga fillimi i zbatimit të projektit.
Administratori i Shoqërisë Altin Fani, sqaron më tej në letrën e tij se “në automjetet e angazhuara në proceset logjistike të projektit, janë kryer ndarje në kompartamente të veçanta për çdo proces pune”.
Më tej, letra sqaron se “bazuar në Ligjin Nr. 10463, datë 22.09.2011, “Për manaxhimin e integruar të mbetjeve” (të ndryshuar) dhe V.K.M. Nr. 798, datë 29.09.2010, “Për Administrimin e Mbetjeve Spitalore,” Shtojca 4, në këto automjetete ekziston një ndarje e posaçme për transportin e mbetjeve mjekësore, e cila e veçon këtë hapësirë nga pjesa tjetër e automjetit. Gjithashtu, të gjitha mbetjet mjekësore të gjeneruara nga projekti grumbullohen dhe transportohen në kontenitor të posaçëm plastik të etiketuar, të cilët janë sipas standarteve të OBSH-së dhe kërkesave të përcaktuara nga autoriteti përkatës Ministria e Mjedisit”.
Gjithashtu, në fotografitë bashkëlidhur letrës të Automjetit që mbulon Qarkun e Tropojës, është lehtësisht e identifikueshme çdo hollësi teknike e shpjeguar sa më sipër.
“Duke garantuar transparencën dhe integritetin tonë profesional, jemi të gatshëm në cdo kohë t’ju informojmë për çdo detaj lidhur me zbatimin e Kontratës për Kontrollin Shëndetësor Bazë për Grupmoshat 40-65 vjeç,” përfundon letra drejtuar Ministrisë së Shëndetësisë.
