Kalimi i Antoine Griezmann te Barcelona mund të rezultojë goditja më e madhe e merkatos së kësaj vere. Pavarësisht polemikave që e kanë shoqëruar këtë “telenovelë”, me Atletico Madridin që pretendon se Barcelona ka bërë lojë të pistë me sulmuesin francez, kampioni i botës do të jetë një vlerë e madhe e shtuar në formacionin e Ernesto Valverde.
Nëse deri në verën e vitit 2017, në “Camp Nou” ishte “tridenti” i frikshëm MSN (Messi-Suarez-Neymar), që prodhoi bollëk golash dhe fitoi disa trofe, tashmë janë të gjitha kushtet për t’i përjetuar sërish ato emocione. Ndryshon vetëm një germë, G në vend të N, Griezmann në vend të Neymar. MSN do të bëhet tashmë MSG (Messi-Suarez-Griezman).
Mbrojtjet dhe portierët kundërshtarë, qoftë në La Liga, qoftë në Europë, kur të nisë Champions-i, janë të paralajmëruar. Tifozët e Barcelonës mezi po presin të shohin në veprim tre sulmues “vrasës”, të pangopur me golat, të gatshëm për të dhuruar spektakël së bashku në fushën e blertë.
Megjithatë, Barcelona nuk do të jetë vetëm ata të tre. Një skuadër e tërë e mbushur me yje, ajo Blaugrana mund të krenohet karshi gjithkujt. Nuk e kemi fjalën vetëm për formacionin e parë, por edhe stolin, në të cilin figurojnë emra me shumë peshë. Referuar Transfermarkt, çmimit zyrtar të secilit lojtar, mund të dalim në përfundimin se formacioni i Barcelonës së sezonit të ri (shiko grafikun shoqërues të shkrimit) do të kapë shifrën totale prej 374.6 milionë eurove.
Diçka më pak llogaritet stoli i rezervave, 331.7 milionë euro. Shuma e këtyre dy shifrave përbën vlerën e tërë skuadrës katalanase, nëse nuk ndodhin lëvizje të tjera në merkaton e kësaj vere. Me siguri, mund të ketë ndonjë largim, sepse për afrime të tjera nuk ka më nevojë. Fjala vjen, Coutinho dhe Dembele, sipas këtij top-formacioni, e shohin veten në stol. A do ta pranojnë ata këtë rol?
E vështirë duket, por kjo nuk do të ishte e preferueshme as për Barcelonën, sepse të dy sëbashku kanë kushtuar plot 270 milionë euro. Pra, më shumë se gjysma e formacionit startues të Valverde. Për këtë të fundit bëhet akoma më e vështirë puna, sepse duhet të përzgjedhë mes yjeve, por edhe t’i menaxhojë ata në kushtet e një rivaliteti dhe konkurrence asfiksuese./telesport.al
g.kosovari
