Analisti Lorenc Vangjeli vlerësoi ndryshimet që ka pësuar Shqipëria dhe shoqëria shqiptare që nga dhjetori i vitit 1990, duke e përshkruar transformimin si “të jashtëzakonshëm, të paprecedent dhe të pamendueshëm”.
“Ka kaluar një brez i tërë që nga dhjetori ’90, dhe nëse bëhet një krahasim me situatën e sotme, ndryshimi është i jashtëzakonshëm,” tha Vangjeli. Ai theksoi se rruga që ka ndjekur vendi dhe shoqëria ka krijuar një realitet të ri gjeopolitik, ku shqiptarët e Kosovës dhe të Maqedonisë shfaqen krejt ndryshe nga një dekadë më parë.
Në emisionin “Trialog” në RTSH, Vangjeli tha se Shqipëria është sot shumë herë më mirë se sa ka qenë, por gjithashtu shumë herë më keq se sa do të duhej të ishte, për shkak të mungesës së përkushtimit të politikës.
“Ky vend gjithçka e ka me shumicë: përveç dashurisë, tensioni dhe urrejtja janë të shumta. Njerëzit që janë në politikë e shikojnë vendin në dy kënde të ndryshme: kur janë në opozitë e shohin si agjenci funerale, dhe kur janë në pushtet i ngjan konceptit të Edenit,” shtoi Vangjeli, duke vënë në dukje dualitetin e perceptimit politik dhe shoqëror në vend.
Ai përfundoi duke theksuar se sfidat e shoqërisë shqiptare janë ende të mëdha, por ndryshimet historike dhe gjeopolitike e kanë vendosur vendin në një rrugë të re zhvillimi.
Analisti Vangjeli vlerëson se edhe në përpjekjet e fundit politike, protagonizmi i të rinjve nuk sjell risinë e pritur.
“Nuk po flas për emrin e një partie, por për atë që ka prodhuar shoqëria shqiptare. A frymëzon apelimi i këtij projektit? A është kjo mënyra? A ka gabime nëse do të realizohej sipas projeksionit të këtij arkitekti, do të ishte më mirë? Janë të gjitha këto çështje në këtë algoritëm kur futen dy fjalë: ‘protagonizëm’ dhe ‘populizëm’, dhe historia shkon ndryshe,” tha Vangjeli.
Ai thekson se pasiviteti i shqiptarëve ndaj politikës lidhet ngushtë me mungesën e frymëzimit.
“Është e njëjta gotë verë nga e njëjta fuçi e helmuar. Asgjë e re, të njëjtat gjëra që kanë ndodhur në PD dhe PS. Sjellja e politikanëve të rinj duket sikur recitojnë rolet e të tjerëve. Politiakët nuk janë më në gjendje të drejtojnë dhe kontrollojnë shoqëritë, dhe këtu mund të ndodhë edhe diçka më e keqe”, tha ai.
