Kryetari i Partisë Demokratike, Lulzim Basha ka përsëritur akuzën ndaj kryeministrit Edi Rama, se ky i fundit po kërkon të mbajë zgjedhje si në diktaturë.
Por në daljen e tij publike, kreu i PD është treguar më i përmbajtur sesa ish-deputeti Aurel Bylykbashi, i cili bënte thirrje për përplasje të dhunshme.
Duke folur për mediat nga selia blu, Basha tha se opozita nuk vjen në pushtet me dhunë, por me forcën e mendjes dhe zemrave.
“Rama po kërkon të mbajë zgjedhje farsë për të zgjatur aktivitetin e tij kriminal. Nuk do ta shpëtojë dot regjimin e tij kriminal por fati i Edi Ramës duket se do të jetë më i keq se Ramiz Alisë. Edi Rama ka vendosur të bëjë votimet e tij njëpartiake.
Ka javë të tëra që bredh në Shqipëri duke provokuar dhe nxitur dhunë. Edi Rama është i mësuar me dhunën. Po kërkon ta mbajë pushtetin me dhunë dhe në aleancë me krimin. Ai e di se vetëm nëse ka dhunë dhe përplasje civile do ti shpëtojë gjykimit. Por plani i tij për dhunë ka dështuar.
Opozita nuk vjen në pushtet me dhunë por duke rrëzuar regjimin kriminal të Ramës me forcën e mendjeve dhe zemrave të bashkuara të shqiptarëve”, tha Basha.
Ditën e sotme Aurel Bylykbashi u shoqërua nga policia për thirrjet që nxisnin dhunë. Ndërsa më herët, opozita është paralajmëruar në vijimësi nga partnerët ndërkombëtarë që të shmangë aktet e dhunës në protesta, apo gjatë ditës së zgjedhjeve.
