Arrestohet nga policia Oltion Buzi, pronari i subjektit tregtar ‘Buzi Store’. Ndalimi i tij u bë me vendim gjykate që kishte caktuar në mungesë arrest në burg për veprën penale ‘Fshehje të ardhurash’. Në janar të këtij viti ai u shpall në kërkim me urdhër të prokurorisë së Tiranës e cila zbuloi evazionin fiskal. Hetimet kishin nisur që në vitin 2024, dhe sipas prokurorisë u zbulua se ‘Buzi Store’ nuk ka deklaruar 3.7 milionë euro të ardhura në autoritetet tatimore.
Sipas Prokurorisë, Oltion Buzi përdorte një sistem të paligjshëm për lëshimin e faturave false tatimore, sistem kompjuterik i paautorizuar nga Tatimet në vend që operonte përmes një platformës online të palicencuar “store.dyqanimen.com”.
Nga hetimet rezultoi se gjatë shitjeve në bizneset e subjektit të tij, Buzi lëshohen faturave të falsifikuara dhe të pa fiskalizuara. Hetimet nisën pas referimit të bërë nga Drejtoria e Hetimit Tatimor, ku u zbulua se ky subjekt tregtar lëshonte fatura me vlera më të mëdha, ndërkohë që deklaronte një vlerë shumë më të vogël për qëllime tatimore, duke shmangur kështu pagesën e detyrimeve tatimore.
Dy muaj më parë, organi i akuzës njoftoi se ishte ushtruar kontroll në tetë pika fizike ku “Buzi Store” e ushtron aktivitetin dhe u sekuestruan njësi kompjuterike, telefona celularë, tableta dhe vlera monetare në valuta të ndryshme që arrijnë në tetë milionë lekë të reja, të cilat nuk ishin të justifikuara me dokumentacion ligjor.
