Partia Socialiste në fund të muajit gusht do të mbledhë Asamblenë, ku do të diskutohet mbi planin katër vjeçar qeverisës. Sipas burimeve të “Gazetës Sot” në selinë rozë, ende nuk ka një datë zyrtare se kur do të mblidhet Asambleja, por bëhet e ditur se 25 gushti është data që po diskutohet dhe që shumë shpejt pritet të vendoset. Përpara se kryeministri të krijojë kabinetin e ri qeveritar, ka vendosur që të diskutojë me deputetët.
Sipas burimeve, aty do diskutohen disa çështje, ku më e rëndësishmja është analiza e zgjedhjeve. Mësohet se 5 grupet e punës të ngritura nga Rama pak ditë më parë po i mbyllin raportet e tyre dhe po ia dorëzojnë kryeministrit. Në korrik, Rama ngriti një grup pune për reformën në administratë, një grup për analizën e rezultatit në zgjedhje, një grup për aktivitetin parlamentar, një grup mbi nevojat ekonomike e sociale dhe mbi burimet njerëzore të PS dhe një grup mbi dokumentet që u kërkohen qytetarëve në zyrat e shtetit.
Secili prej krerëve të këtyre grupeve në Asamble do të prezantojë të dhënat e raportit, ku më i rëndësishmi është ai mbi analizën e rezultatit të zgjedhjeve sepse ka të bëjë me vetë angazhimin e partisë. Po ashtu, aty Rama pritet që të publikojë dhe emrat e parë të ministrave dhe kreun e Kuvendit, apo dhe kreun e grupit parlamentar. Nëse Gramoz Ruçi merr drejtimin e Parlamentit, emri që përflitet si kryetar grupi është ai i Taulant Ballës.
Sa i takon situatës aktuale, të gjithë grupet janë drejt fundit dhe pasi të mbyllin raportet do ia dorëzojnë kryeministrit, i cili do jetë i vetmi në dijeni të tyre. Më pas në Asamble do bëhet një përmbledhje e gjetjeve dhe më pas do ngrihet një grup pune për secilin sektor për të vijuar me hapat e mëtejshëm.
Nëse marrim administratën, në bazë të raportit që do sjellë Niko Peleshi dhe anëtarët e tjerë do hartohet dhe strategjia e reformës. Fillimisht do nisë shpërndarja e formularëve në të gjithë administratën dhe do pyetet secili punonjës. Ndërkohë sa i takon situatës në PS, në bazë të rezultatit të zgjedhjeve do përcaktohet dhe qeveria e re.
Në Asamble, Rama pritet që të bëjë fakt të kryer këtë gjë, duke vendosur të shpërblejë ata që dolën shumë mirë në zgjedhje. Ndërkohë do merret vendimi se çfarë do të ndodhë me zonat ku pati rezultat të dobët. Mbetet të shihet nëse do ketë zgjedhje për kryetarët e degëve, do ketë largime, apo thjesht do kërkohet më shumë vëmendje. Zonat që dolën më dobët janë: Elbasani, Korça, Kavaja dhe Dibra.
Spastrimet në administratë
Çështja më e rëndësishme që po pritet nga qeveria e re është administrata. Në fushatë kryeministri kërkoi mbi 71 vota për të dërguar për skrap tepsinë e pushtetit dhe qytetarët ia besuan dhe për 4 vite të tjera. Për këtë arsye, sinjalet janë dhënë se në shtator do të ketë tërmet në administratën shqiptare. Aktualisht, 3 janë institucionet që ka nisur reforma: hipotekat, spitalet dhe tatimet.
Por në shtator do ketë furtunë në të gjitha nivelet. Pasi të jetë analizuar raporti i hartuar nga grupi për situatën në administratë do ndërtohet dhe strategjia se si do të procedohet. Mësohet se të parët që do e pësojnë do të jenë punonjësit e LSI. Deri më tani ka pasur largime në nivele drejtorësh, por shumë shpejt spastrimet do i përfshijnë të gjitha nivelet, nga punonjësi më i ulët te shefat. Në Asamble do hidhen dhe piketat e para të reformave që do nisë PS.
