Forumi Rinor i PS ka festuar 24 vjetorin e themelimit të saj përmes motos Më të mirët në PS, ndërsa Kryeministri Rama, në fillim të fjalës së tij ka bërë shaka me të rinjtë e FRESSH, duke thënë se mesa duket në forum, “diktatura e meshkujve” po zëvendësohet nga ajo e femrave.
“Duke iu parë po mendoja që vërtetë PS është e angazhuar me zemër dhe mendje në një betejë emancipuese për barazinë gjinore por jo deri në atë pikë sa të kemi 10% burra dhe djem dhe 90% gra dhe vajza sepse pastaj do të kalonim nga diktatura e burrave tek diktatura e grave. Kur e mendon mua me duket më e pëlqyeshme por siç cdo diktaturë është ferr më vete”, tha kryeministri.
Kryeministri tha se ai u është mirënjohës të rinjve të FRESSH, duke vlerësuar si çmimin më të lartë të marrë prej tij, pikërisht vlerësimin e të rinjve të forumit.
“Duke pasur praninë tuaj në këtë proces të ripërtëritjes së PS-së ne marrim një kurajë të veçantë dhe për mua është një inkurajim shumë i posaçëm pasi asnjëri nga ju nuk është një individ që mund të gënjehet dhe që mund të tërhiqet pas një ideje apo një force nëse ideja dhe forca në fjalë nuk e kanë fuqinë e duhur bindëse për zemrën dhe për mendjen. Kjo pikërisht më tregon edhe pa pasur nevojë për fjalë që ajo çka ne po bëjmë meriton respektin tuaj dhe respekti juaj është çmimi më i lartë që unë mund të merrja si kryeministër pas 2 vjet e gjysmë përpjekje dhe ju falënderoj për këtë çmim”, tha Rama.
Politika ka marrë shumë goditje tha Rama, dhe është cënuar rëndë imazhi dhe besueshmëria e saj. Kësisoj, sipas Kryeministrit, ardhja e të rinjve në PS hap një tjetër rrugë.
“Politika ka marrë shumë goditje dhe është e cënuar rëndë në imazhin e besueshmërinë e saj. Ndërkohë vendi është në një proces kompleks sfidash, vështirësish, përpjekjesh për transformim, por edhe mbi prodhimi të energjive negative dhe të cinizmit ndaj çdo gjëje që ndodh. mbiprodhim që nuk e ndal dot procesin ku ne udhëheqim me bindje të madhe dhe vullnet të hekurt një sërë reformash, por e pengon jashtë mase”, tha Rama.
Kryeministri Edi Rama ka shpërndarë kartat e anëtarësisë në Partinë Socialiste për studentët e ekselencës që janë pjesë e kësaj force politike.
