Kryeministri i Pakistanit, Shehbaz Sharif, deklaroi se 24 orët e ardhshme konsiderohen vendimtare për zhvillimet në Lindjen e Mesme, ndërsa negociatat për një marrëveshje paqeje mes Shteteve të Bashkuara dhe Iranit po afrohen drejt finalizimit.
Në një postim në rrjetin social X, Sharif tha se ekziston mundësia që marrëveshja të finalizohet brenda 24 orëve të ardhshme dhe se nënshkrimi i saj pritet të kryhet në mënyrë elektronike. Ai shtoi se bisedimet teknike mes palëve do të vijojnë gjatë javës së ardhshme.
Kryeministri pakistanez falënderoi Shtetet e Bashkuara, Iranin dhe vendet e rajonit për angazhimin e tyre në procesin negociues, duke vlerësuar rolin e diplomacisë në afrimin e palëve drejt një zgjidhjeje.
“Jemi të bindur se kjo marrëveshje historike paqeje do të krijojë një bazë të fortë për paqe të qëndrueshme dhe stabilitet rajonal”, u shpreh Sharif.
Deklarata e tij vjen në një moment kur tensionet në rajon mbeten të larta, me raportime për vazhdimin e operacioneve ushtarake izraelite në Liban, ndërsa përpjekjet diplomatike për t’i dhënë fund konfliktit mes SHBA-së dhe Iranit po intensifikohen.
