Rreth 2300 emigrantë kanë hyrë gjatë natës në Preshevë, kryesisht përmes Llojanit-Miratocës.
Agjensia e lajmeve “Presheva Jonë” bën të ditur se aktualisht emigrantët gjenden jo vetëm para qendrës së pranimit në “Tasjan”, por kanë mbushur edhe rrugët e qytetit. Sipas asaj që bëhet e ditur, emigrantët ishin jo vetëm të lodhur, por edhe të gjakosur e të pangrënë. Ata i kanë cilësuar policët maqedonas si gjakpirës dhe kriminelë.
“Policia maqedonase janë kriminelë dhe të ndyrë. Ata na dhanë ujë prej lumit, bukën e tri ditëve dhe qumështin e dhive për fëmijët tanë nga 10 a 15 euro. Kur mbërritën gazetarët e huaj në kufi, policia maqedonase u afrua me disa paketa gjoja po na ndihmojnë. Ne e refuzuam ushqimin e tyre. Ata ishin gjakpirës dhe kriminelë ! Falenderojmë popullin shqiptar, qytetarët e Preshevës për mikpritjen që na ofruan ndihma pa pagese. Allahu ja pagoftë!..” tha Abdul ben Khaled nga Siria, i cili bashkë me familjen kishte udhëtuar për 14 ditë nga Siria deri në Preshevë.
