Nxënësit që ndjekin studimet në institucionet arsimore publike të arsimit parauniversitar, mund të përfitojnë bursë nga buxheti vjetor i miratuar për Ministrinë e Arsimit dhe Sportit dhe Ministrinë e Mirëqenies Sociale dhe Rinisë.
Për hyrjet e reja në vitin e parë, në sistemin arsimor publik që ndjekin shkollat profesionale, për vitin e ri mësimor 2016-2017 MMSR-ja jep 2.100 bursa. Afati përfundimtar për shqyrtimin dhe miratimin e bursave nga njësitë bazë të qeverisjes vendore për të gjitha kategoritë e shkollave është data 15 mars 2017. Vendimet e këshillave të njësive të qeverisjes vendore, të miratuara jashtë këtij afati, janë të pavlefshme. Veç hyrjeve të reja, përfitojnë edhe nxënësit e viteve të mëparshme që plotësojë kriterin ekonomik, apo kanë një status social, siç janë jetimët apo invalidët. Nxënësve që nuk frekuentojnë mësimin apo nuk ndjekin praktikën profesionale pa arsye ligjore apo shëndetësore, u ndërpritet menjëherë bursa.
Kriteret
Përfitojnë bursë shteti: nxënësit që vazhdojnë studimet në largësinë mbi 5 km nga vendbanimi i përhershëm i tyre e që plotësojnë kriterin ekonomik; nxënësit që banojnë në zonat rurale që nuk kanë shkollë 9-vjeçare brenda rrezes prej 5 km, që plotësojnë kriterin ekonomik, dhe akomodohen në konvikte publike. Bursë shteti përfitojnë nxënësit e arsimit profesional që kanë mbaruar vitin shkollor pararendës me të gjitha notat 10. Jashtë kriterit ekonomik përfshihen disa kategori nxënësish me status social, siç janë: nxënësit që kanë përfituar statusin e jetimit; nxënësit që kanë humbur kujdestarinë prindërore, me vendim gjykate të formës së prerë; nxënësit që gëzojnë statusin ligjor të invalidit paraplegjik dhe tetraplegjik; nxënësit që gëzojnë statusin ligjor që nuk shikojnë apo nuk dëgjojnë; nxënësit, fëmijë të personave që gëzojnë statusin e invalidit e përfitojnë pension invaliditeti dhe nuk kanë të ardhura të tjera; nxënësit e komunitetit rom dhe egjiptian që regjistrohen dhe ndjekin arsimin e mesëm profesional; nxënësit që janë identifikuar dhe trajtuar si viktima të trafikut të qenieve njerëzore dhe kanë humbur kujdesin prindëror; nxënësit, fëmijë të punonjësve të Policisë së Shtetit, të Gardës së Republikës, të Shërbimit për Çështjet e Brendshme dhe Ankesat, të Policisë së Mbrojtjes nga Zjarri dhe të Shpëtimit, të Forcave të Armatosura, të Shërbimit Informativ të Shtetit dhe të Policisë së Burgjeve, që kanë humbur jetën në krye dhe për shkak të detyrës. Po ashtu, sipas vendimit të qeverisë, bursë përfitojnë edhe ata nxënës që ndjekin me kohë të plotë arsimin profesional në disa degë parësore, ku përfshihen: bujqësi, veterinari, pyje, ndërtim, peshkim, detari, gjeologji-miniera dhe shpim e shfrytëzim i vendburimeve të naftës dhe gazit.
Si dhe, nxënësit me vendbanim të përhershëm në zonat verilindore dhe juglindore të vendit: Dibër, Bulqizë, Mat, Kukës, Has, Tropojë, Pukë, Mirditë, Malësi e Madhe, Librazhd, Gramsh, Kolonjë, Përmet, Skrapar dhe Tepelenë. Sipas vendimit të qeverisë, këshillat bashkiakë duhet t’u japin përparësi nxënësve që vijnë nga shtresat sociale në nevojë për t’u dhënë bursë të plotë, si dhe nxënëseve vajza. “Për kushte ekonomike të barabarta në trajtimin me bursë, prioritet kanë nxënëset vajza. Njësitë bazë të qeverisjes vendore, në pamundësi trajtimi me bursë të plotë, brenda planit të miratuar, mund të miratojnë për nxënësit dhe 1/2 (gjysmë) burse”, përcaktohet në vendim. /GSH/a.m.
