Kryetari i Partisë Demokratike, Sali Berisha, u shpreh se është i gatshëm të përgjigjet para çdo kërkese të drejtësisë. Në një konferencë për shtyp sot, 13 nëntor, ai deklaroi se ka vetëm një kusht, që të njoftohet siç duhet. Deklaratën ai e bëri pas pyetjeve të gazetarëve në lidhje me fletëthirrjen nga ana e SPAK-ut për 21 janarin.
“Njoftimi duhet të vijë siç kanë ardhur në dhjetëra njoftime të tjera dhe unë i jam përgjigjur çdo njoftimi që ka ardhur. Përdorimi i kësaj është akti i shëmtuar i Altin Troplinit, një mercenar i regjimit të Ramës që kujton se mund të mbulojë sadopak me zhurma të tilla krimet e shëmtuara të Ramës dhe Ballukut. Asnjëherë mos më pyesni a do shkosh? Unë do shkoj në çdo rast që do thirrem për çdo problem në organet e drejtësisë. Nuk mund të ketë hezitim dhe mëdyshje”, tha Berisha.
Kreu i demokratëve deklaroi se çështja e 21 janarit po përdoret për propagandë teksa akuzoi kryeministrin Edi Rama se ka penguar hetimet e saj.
“Çështja e 21 janarit është hetuar një herë nga një armike e egër e Sali Berishës dhe PD për të cilën kam shprehur publikisht konsideratat. Çështja e 21 janarit nga viti 2013 kur ne kemi humbur pushtetin dhe gjer sot është penguar të hetohet, mendoj unë, vetëm e vetëm për shkak të Edi Ramës sepse deklaratat e qeverisë së SHBA-ve dhe BE-së janë shumë të qarta, kërkojnë hetimin nga polici te organizatori kryesor. Çfarë ka ndodhur? Prej 13 vitesh, kjo çështje përdoret për propagandë, por shoferi që i përdori mish për top njerëzit siç e ka thënë bukur shkrimtari që merret tani me probleme teologjike, Ben Blushi, ishte Edi Rama. Ai i solli në protestën më të dhunshme”, tha Berisha.
Sali Berisha, vijoi akuzat ndaj qeverisë duke folur edhe për atentatin në Rinas. Ai u shpreh se banda që vrau Gilmando Danin dhe plagosi një tjetër ishte e lidhur me të.
Sipas tij, kjo tregon shkallën e pasigurisë në vend.
“Banda që ekzekutoi Gilmando Danin dhe plagosi rëndë Mustafa Sheqerin kontrollonte aeroportin e Rinasit në çdo skaj në rrafshin e sigurisë së tij”, u shpreh kryedemokrati.
