Një emigrant boshnjak në Zvicër është gjobitur me katër mijë franga për shkak se u ndalon fëmijëve të tij përfshirjen në aktivitetet sociale e shkollore.
Emir Tahiroviç, 40 vjeç, nuk ka lejuar që vajza e tij të ndjekë lëndën e notit në shkollë, ndërsa të birit i ndalon të këndojë në kor. Për të dy rastet, Tahiroviç, musliman i devotshëm, thotë se nuk ia lejon feja një gjë të tillë.
“Do të isha i pafe po ta lejoja”, thotë Tahiroviç, kur është pyetur se përse nuk e lejon vajzën të shkojë në orën e notit, ndërsa për djalin thotë se kënga është e ndaluar për muslimanët.
Boshnjaku është i papunë dhe jeton me ndihma sociale nga shteti zviceran. Llogaritet se deri tani ka marrë 300 mijë franga, duke përfituar nga ligjet e Zvicrës, por vetëm nga ato që i interesojnë. Kjo gjë e ka shndërruar në një njeri të urryer për komunitetit vendas.
Prokurorja e çështjes ka deklaruar se të huajt duhet të respektojnë ligjet, por Tahiroviç këmbëngul se do të vazhdojë të luftojë për të drejtat e tij. Nga shtypi zviceran është etiketuar si “Mühsam-Muslim”, myslimani i mërzitshëm.
Interesant është edhe fakti që Tahiroviç, edhe pse ka zgjedhur të jetojë në një vend kristian dhe me kryqin në flamur, deklaron se ka probleme me gërmën T, pasi ajo i kujton kryqin.
d.i.
