Të paktën 20 persona janë shoqëruar në polici për t’u marrë në pyetje lidhur me atentatin e regjistruar një ditë më parë në Sukth të Durrësit, ku mbeti i vrarë Arben Mërkuri (Ismaili), 48-vjeç.
Report Tv mëson se kamerat e sigurisë kanë fiksuar 2 persona si autorë, por që është e vështirë identifikimi i tyre. Nga sa bëhet e ditur 10 persona kanë qenë dëshmitarë okularë të cilët kanë dëgjuar të shtënat me armë. Sipas dëshmisë së tyre të dhënë për uniformat blu, ato kanë dëgjuar zhurmën kur një automjet ka mbërritur me shpejtësi në vendin ku ndodhi vrasja, të shtënat me armë si edhe përplasje të dyerve të makinave, që po sipas tyre mjeti Benz tip GLE-së ngjyrë gri u largua me shpejtësi nga vendi i ngjarjes.
Pista kryesore e hetimit është ajo e përfshirjes në konflikte të mëparshme dhe larje hesapesh, pasi Mërkuri është një emër i njohur për policinë e qytetit dhe jo vetëm.
‘Maneci’ një emër i njohur për Policinë e Shtetit, dyshohet i përfshirë edhe në dhunën e ushtruar ndaj biznesmenit amerikano-libanez, Faadi Mitri pranë kryqëzimit të Laknasit, pasditen e 10 shtatorit 2016 për shkak të investimit që po kryente në zonën e Gjirit të Lalzit. Por përveç kësaj ngjarjeje, ai dyshohet edhe si vrasës me pagesë, por që asnjëherë nuk u arrit të dokumentohej.
Arben Mërkuri njihet si mik i Landi Muharremit, Rrumit të Shijakut, por që për shkak të një konflikti nuk shoqëroheshin më. Landi Muharremi ka qenë në makinë me prokurorin Arjan Ndoji ditën që këtij të fundit iu bë atentat, ku mbeti i vrarë shoferi i prokurorit. Pistat kryesore të hetimit është prishja e pazareve të drogës, kjo për shkak se viktima ka vuajtur dënimin në Itali për trafik narkotike, por edhe larja e hesapeve. 48-vjeçari ka qenë gjithashtu një nga personat e dyshuar që ka marrë pjesë në ekzekutimin e 4 viteve më parë të Ervin Dalipajt dhe Juxhin Dautajt.
Mërkuri ka në pronësi një objekt 3 katësh, një dyqan kancelari, një market në Sukth, një dyqan që ende nuk e kishte hapur, ku dhe ndodhi ngjarja si edhe një kompani që merret me mbarështimin e pulave. Madje së fundmi ai është përfshirë në një ngjarje ku ka tentuar që t’i thyejë kamerën një gazetareje investigative, pasi po denonconte se ka groposur pulat me grip shpendësh në mënyrë të paligjshme. Nga sa mësohet, në Itali është i dyshuar se ka vrarë një prostitutë, ku edhe një video shihet teksa thotë se “deri dje i bënte femrat copa-copa”, dhe se tani kishte ndryshuar pasi ka vetë një vajzë.
g.kosovari
