Gjykata e Fierit me kërkesë të Prokurorisë ka dhënë masën e sigurisë 20 ditë burg për efektivin e Forcave të Ndërhyrjes së Shpejtë, Maliq Shehaj, i arrestuar me akuzën e vrasjes me dashje të mbetur në tentativë.
42-vjeçari në gjendje të dehur shkrehu armën ndaj kolegëve të tij pasi fillimisht ishte konfliktuar me dy persona. Në momentin kur për t’i ndarë kanë ndërhyrë tre punonjës policie, dy civilë dhe një me uniformë, Shehaj ka qëlluar me pistoletë.
“Gjatë ndërhyrjes ky shtetas ka nxjerrë një armë tip pistoletë dhe pasi e ka mbushur e ka drejtuar atë ndaj punonjësve të policisë. Në këtë kohë ka bërë dhe shkrepjen e armës por pa shkaktuar dëme, pasi të tre punonjësit e policisë, gjatë ndërhyrjes, e kanë devijuar drejtimin e qitjes”, bën me dije Policia.
Kurse Shehaj pretendon se konflikti me dy personat kishte ardhur pasi i bllokuan rrugën me makinë dhe e kanë qëlluar me shufër hekuri në automjet.
Ndërsa për të shtënën me pistoletë, ka deklaruar se ka kryer qitje të pavullnetshme gjatë konfliktit fizik./panorama/a.k
