Qytetarët që kanë detyrime të pashlyera për energjinë elektrike kanë afat edhe 1 muaj për të përfituar nga skema e pagesës me këste.
OSHEE u ka rikujtuar abonentëve debitorë se në 30 qershor skadon afati për lidhjen e aktmarrëveshjes, prej së cilës këtyre familjeve u mundësohet që ta shlyejnë borxhin e akumuluar me këste të reduktuara mujore, që fillojnë nga 2500 lekë në muaj.
Për kategori të veçanta, si pensionistët dhe familjet që trajtohen me asistencë, pagesa është edhe më e reduktuar, duke u përgjysmuar në vlerën 1000 dhe 1200 lekë çdo muaj deri në fshirjen e plotë të debisë.
Përpos kësaj, përmes kësaj oferte këta qytetarë apo biznese kanë mundësi po ashtu që të përfitojnë reduktim të kamatëvonesës në rastet kur shprehin gatishmërinë për të paguar të plotë borxhin e akumuluar.
Për abonentët familjarë, që do të tregohen të gatshëm për ta paguar të plotë dhe menjëherë borxhin që kanë, do të aplikohet 70 për qind zbritje e kamatëvonesave.
Ndërkohë lehtësira parashikohen edhe për bizneset.
PENSIONISTËT
Pensionistët do të kenë mundësi që ta shlyejnë borxhin me këste në vlerë 1200 lekë në muaj. Operatori i Shpërndarjes së Energjisë Elektrike ka radhitur edhe kushtet për përfitimin e reduktimit, të cilat janë: përditësimi i të dhënave të kontratës, paraqitja e certifikatës familjare ku përcaktohet që pensionisti është kryefamiljar, paraqitja e librezës së pensionit, si edhe dokumentacioni që dëshmon nëse kanë përfituar ose jo kompensim për faturat e dritave.
SITUATA
Nga bilanci i OSHEE rezulton se për periudhën nga dhjetori i vitit 2014, kur nisi implementimin skema lehtë- suese, deri në maj të këtij viti, janë nënshkruar 429 mijë aktmarrëveshje.
“Të dhënat nga Divizioni Tregtar, pranë kompanisë, tregojnë se në periudhën prej muajit dhjetor 2014, kur nisi aplikimi i skemave lehtësuese, e deri në fund të muajit maj 2016, janë nënshkruar 429.005 aktmarrëveshje midis OSHEE-së dhe abonentëve debitorë, të kategorive të ndryshme, si privat, familje, me ndihmë ekonomike, pensionistë etj”, bëhet e ditur nga OSHEE.
Pjesa më e madhe, duke qenë se janë familjarë, kanë përfituar nga mundësia e shlyerjes së borxhit të plotë. Kjo ka sjellë për ta reduktim të kamatëvonesave në masën 70 për qind. Në radhët e debitorëve ka edhe nga ata që kanë zgjedhur pagesën me këste mujore në shumën e 2500 lekëve.
Për kategori të veçanta, sikundër janë pensionistët, familjet që trajtohen me ndihmë ekonomike, është bërë i mundur minimizimi i kësteve në masën 1000 dhe 1200 lekë në muaj.
Panorama/d.i.
