Buna mund të bëhet një nga pikat ku infrastruktura e re do të ndryshojë më shumë veriun e Shqipërisë.
Në vitet e ardhshme mbi lumë parashikohen dy ura të reja, të lidhura me dy projekte të mëdha rrugore.
E para do të jetë pjesë e autostradës Muriqan–Lezhë, segmenti verior i Korridorit Adriatiko–Jonian. Ura e Korridorit Blu projektohet rreth 480 metra e gjatë dhe 29.5 metra e gjerë, me një hapësirë qendrore prej 200 metrash.
Ajo do të jetë pjesë e një autostrade me katër korsi, duke krijuar një lidhje të re me Malin e Zi dhe duke larguar trafikun tranzit nga rrjeti ekzistues.
Por disa kilometra më në perëndim parashikohet një urë e dytë.
Ura Pulaj–Shën Nikollë do të lidhë zonën e Velipojës me territorin e Malit të Zi dhe më tej me Ulqinin.
Në qershor 2026 autoritetet malazeze konfirmuan se kishin marrë nga pala shqiptare tre variante konceptuale për urën dhe se bashkëpunimi teknik mes dy vendeve do të vijonte.
Ndërtimi i saj lidhet edhe me krijimin e një pike të përbashkët kufitare Shën Nikollë–Pulaj.
Ky projekt ka një funksion tjetër, jo vetëm transport rrugor, por edhe lidhje turistike, me korsi për biçikleta dhe hapësira për këmbësorë.
Pra, për herë të parë, Shkodra mund të fitojë njëkohësisht dy dalje të reja infrastrukturore mbi Bunë. Njëra e lidh qytetin dhe veriun e vendit me korridorin e madh europian veri–jug. Tjetra afron Velipojën me Ulqinin dhe krijon një bosht të ri turistik përgjatë bregdetit.
Nëse të dy projektet realizohen, ndikimi nuk do të jetë vetëm në trafik por mund të ndryshojnë mënyrën si lidhet Shkodra me Malin e Zi, si zhvillohet turizmi në Velipojë dhe si pozicionohet veriu i Shqipërisë në hartën rajonale të transportit.
