Edhe pse epidemia e gripit vazhdon të jetë në pikun e saj, trendi i të prekurve është në rënie dhe numri i pacientëve me situatë të rënduar nga gripi është vetëm 3.
Kjo u konfirmua nga epidemiologu i Institutit të Shëndetit Publik, Artan Simaku.
‘’Situata aktuale paraqitet e qetë. Nga monitorimi në spitale, trendi i vizitave dhe shtrimeve është në rënie’’,-u shpreh Simaku.
Mbyllja e institucioneve arsimore, sipas epidemiologut ka ndikuar pozitivisht në përmirësimin e situatës të epidemisë së gripit.
‘’Kjo është si pasojë e marra nga Ministria e Shëndetësisë që u mbyllën shkollat për të parandaluar përhapjen e gripit. Nga kjo po duken rezultatet e para’’,-u shpreh Simaku për Report TV. Edhe pse trendi është në ulje dhe situata po njeh përmirësim, sërish nuk mungon thirrja për vaksinim, kryesisht fokusi është mbi grupet e riskut.
Aktualisht numri i të prekurve është më pak se 19 mijë dhe rastet e rënda janë vetëm tre.
Raste këto që gripi ju ka rënduar gjendjen shëndetësore, pasi këta pacientë janë të sëmurë kronikë nga sëmundje të tjera që nuk kanë lidhje me epideminë e gripit. /a.m.
