Deputetet gjermanë e kanë aprovuar sot një rezolutë e cila e përshkruan masakrimin e armenëve si gjenocid nga forcat e perandorisë Osmane një shekull më parë një vendim që pritet të përkeqësojë marrëdhëniet mes Gjermanisë e Turqisë.
Qeveritë turke gjithmonë e kanë hedhur poshtë përdorimin e termit gjenocid për të përshkruar masakrën dhe dëbimin e rreth 1.5 milionë armenëve dhe anëtarëve të pakicave krishtere në mbretërinë osmane.
Ndërkohë, OKB e përcakton gjenocidin si çfarëdo akti “me qëllim për të shkatërruar, në tërësi apo pjesërisht, një komb, etnitet, grup fetar apo racor, si të tillë”.
Në anën tjetër, kryeministri turk Bilal Yildirim e ka përshkuar votën si “një test i vërtetë i miqësisë” në mes të vendit të tij dhe Gjermanisë.
Ai tha: “Disa kombe të cilat ne i konsiderojmë mike, kur ato po përballen me probleme në politikat e brendshme, po tentojnë që ta largojnë vëmendjen nga to”, duke shtuar: “Kjo rezolutë është një shembull i asaj.”
Por, dje, ai kishte shkuar edhe më larg, duke thënë se vota është “qesharake” dhe duke argumentuar se vrasjet ishin një ngjarje “e zakonshme” e kohës së luftës.
Për më tepër ai i ka përsëritur komentet e presidentit turk Recep Tayyip Erdogan se marrëdhëniet dypalëshe do të dëmtohen nga vendimi i Gjermanisë për ta quajtur gjenocid masakrën e armenëve nga forcat osmane./a.m.
