Cilido qoftë shkaku i rrëzimit të avionit të “Egypt Air”, ndikimi i tij mbi industrinë egjiptiane të turizmit nuk ka për të qenë i vogël.
Turizmi ka përbërë prej kohësh një prej shtyllave kryesore të ekonomisë së vendit. Por një valë sulmesh ndaj perëndimorëve kohët e fundit dhe shtrirja e ISIS-it në Libinë fqinje, i bën pushuesit e huaj gjithmonë e më ngurrues për të vënë këmbë në Egjipt.
Para rrëzimit të ish-presidentit Hosni Mubarak më 2011, gjatë asaj që tani përshkruhet si “jetëshkurtra pranverë arabe”, turizmi punësonte më shumë se një në 10 individë që përbënin forcën e punës në vend dhe gjeneronte 12,5 miliardë dollarë të ardhura.
Asokohe, Egjipti mund të mikpriste në vit gati 15 milionë turistë të joshur mbi të gjitha nga piramidat e Kajros e resorti i Sharm el Sheikut. Tabloja tani është shumë ndryshe. Pas rrëzimit të avionit rus tetorin e vitit të kaluar, Sharm el-Sheikh vazhdon të jetë subjekt i paralajmërimeve të Foreign Office për shmangien e çdo udhëtimi jo të domosdoshëm drejt asaj që deri vonë konsiderohej si perla turistike e Detit të Kuq.
Ekonomia egjiptiane me shumë gjasa do të vuajë dhe pasojat e rrëzimit të Airbusit A320. Logjika është e thjeshtë, thonë ekspertët; nëse rezulton sulm terrorist, Egjipti do të jetë një viktimë, nëse është defekt teknik, njerëzit sërish do të fajësonin egjiptianët për paaftësi e do ta kërkojnë ta anashkalojnë rrugëtimin në atë vend.
TCH/d.i.
