Kryegjyshi i bektashinjve, Edmond Brahimaj, është pritur sot në Vatikan nga Papa Françesku.
Takim zgjati rreth 45 minuta dhe në të është vlerësuar roli i bektashizmit në Shqipëri
Ati i Shenjtë i tha Baba Mondit se ka mbresa shumë të mira nga Shqipëria, një vend që është në rrugën e drejtë të përparimit.
“Kam mbresa shumë të mira nga vizita në Shqipëri, më bëri përshtypje rinia. Jam i befasuar nga historia e martirëve shqiptarë. Shqiptarët janë në rrugë të drejtë, drejt Zotit dhe përparimit”, tha Papa Françesku.
“Ishte një takim i mrekullueshëm. Papa e la mënjanë protokollin, u afrua si vëllai me vëllanë, me shumë përzemërsi. Ishte mesazh vëllazërie, ripohuam vlerën e dialogut, të takimeve vëllazërore dhe të rëndësisë që kanë komunitetet fetare për shoqërinë e sotme”, tha Baba Mondi pas takimit në një intervistë me Radio Vaticano.
Kreu i bektashinjve shqiptarë shpjegoi edhe se “bektashizmi është një urë lidhjeje midis lindjes e perëndimit”.
“Bektashizmi lufton për familjen dhe e mbron si themel të shoqërisë. Burri dhe gruaja janë të barabartë, bektashinjtë nuk e mbulojnë gruan me ferexhe”, tha Baba Mondi, duke shtuar edhe krenarinë për Nënë Terezën si shqiptare e si “shembull konkret që mishëron dashurinë e Zotit me vepra konkrete ndaj tjetrit”.
D.Ikonomi
