Pagesa për periudhën e papunësisë, e njohur ndryshe si asistenca do të bëhet në varësi të periudhës së kontributit të sigurimit shoqëror, por sipas rregullave të reja është ulur kohëzgjatja e përfitimit, shkruan Gazeta Shqiptare. Gjithçka përcaktohet në një udhëzim të ministrit të Mirëqenies Sociale dhe Rinisë, Blendi Klosi, i cili saktëson dhe procedurat e reja që do të ndiqen për përfitimet në rastet e humbjes së vendit të punës.
Kështu, deri më tani një person që kishte paguar 12 muaj kontribute të sigurimeve shoqërore përfitonte 1 vit asistencë, ndërkohë që me vendimin e ri ai do ta përfitojë vetëm për 3 muaj pagesë. Po ashtu, personat, të cilët kanë një periudhë kontributi të paktën 5-vjeçar do të marrin 9 muaj asistencë, ndërkohë që vetëm ata që kanë paguar sigurime mbi 10 vjet do të kenë mundësi ta marrin pagesën e papunësisë për një vit.
Ulje e kohëzgjatjes së përfitimit është parashikuar edhe në ato raste kur ka ripërsëritje të kërkesës brenda një periudhe të caktuar kohore. Kështu, sipas udhëzimit të ri, në rast të paraqitjes së kërkesës së dytë, për një periudhë të paktën 1-vjeçare të kontributeve të sigurimeve shoqërore, përfitimi i të ardhurës nga papunësia do të jetë 3 muaj, nga 10 muaj që ishte aktualisht.
Po ashtu, sipas rregullave të reja, në rast të paraqitjes së kërkesës së dytë, për një periudhë të paktën 5 vjet të kontributeve të sigurimeve shoqërore, përfitimi i të ardhurës nga papunësia do të jetë 3 muaj dhe po kaq edhe në rast të paraqitjes së kërkesës së dytë, për një periudhë mbi 10 vjet të kontributeve të sigurimeve shoqërore. Megjithatë, ndonëse ulet koha e përfitimit, më herët Klosi ka njoftuar rritjen e pagesës bazë të papunësisë në masën 60%, duke u bërë 11.000 lekë në muaj, nga 6580 lekë që ishte aktualisht.
Përfitimi
Me pagesën e papunësisë mbështeten financiarisht të gjithë punëkërkuesit e papunë në rast papunësie për shkak të shkurtimit të vendit të punës, ndërprerjes së kontratës së punës, falimentimit të ndërmarrjes, zvogëlimit te aktivitetit, etj. Për ta përfituar këtë pagesë, duhet të plotësohen edhe një sërë kushtesh, ku kryesori është që çdo person duhet të ketë kontribuar në sigurimin shoqëror për një periudhë të paktën 12-mujore, për çdo rast përfitimi.
Po ashtu, ai duhet të jetë regjistruar si punëkërkues të papunë pranë zyrës përkatëse të punësimit, të paraqesë kërkesën me shkrim dhe të kenë plotësuar dokumentacionin përkatës, brenda 60 ditëve nga data e lindjes së të drejtës, për t’i përfituar këto të ardhura. Gjithashtu, çdokush duhet të pranojë të punësohet ose të kualifikohet kur u ofrohet nga zyra përkatëse e punësimit. Ndërkaq, në tabelën bashkëngjitur shkrimit gjeni dhe dokumentet që duhet të plotësohen në rast se dëshironi të përfitoni këtë pagesë si dhe rastet kur nuk mund ta përfitoni asistencën.
BW
