Thasë me pará për një nga lojtarët më të fortë e më të përfolur np botë. Kina thërret Zlatan Ibrahimoviç dhe për ta bindur që të lërë Europën është gati të vërë mbi tavolinë një shifër të paparë: 75 milionë euro neto në vit. Lajmin e ka dhënë gazeta italiane La Repubblica. Nuk është as fantamerkato dhe as tentativë publiciteti: paratë për suedezin nuk i ofron ndonjë klub i Superligës së re, por qeveria kineze, me vetë sekretarin e përgjithshëm të Partisë Komuniste, Xi Jinping. Numri një i qeverisë së Pekinit është i çmendur pas futbollit, ka idhull Zlatan dhe e ka kuptuar se, për t’i dhënë shkëlqim programit 10-vjeçar për rivlerësimin e ekonomisë sportive vendase, duhet një lojtar i madh.
Atëherë, përse të mos synojë te idhulli i përhershëm, posterin e të cilit e mban në dhomë? Ibra ka shtyrë çdo diskutim për të ardhmen në përfundim të sezonit, nëse do ta pranojë ofertën kineze do të bëhet më i paguari në histori. Më tepër edhe se Messi, i cili në vit fiton, nga Barcelona e sponsorët, 26 milionë euro. Në Kinë e kanë marrë seriozisht, siç tregojne edhe investimet e fundit. Në janar e shkurt kanë shkuar atje lojtarë kalibri si Alex Teixeira, Lavezzi, Jackson Martinez, Ramires e Gervinho. Ibra do të ishte qershia mbi tortë.
Në gjithë këtë histori, nuk është e qartë se cila nga 18 skuadrat e kampionatit kinez do ta merrte suedezin. Ndoshta një detaj i vockël për Xi Jinping, e rëndësishme është që të jetë në Kinë.
