Partizani do të kërkojë t’i afrohet Skënderbeut, në pritje të ndeshjes së kampionëve me Teutën, por përpara ka një kockë të vështirë për t’u thyer. Të kuqtë luajnë në Ballsh, kundër Bylisit, i cili ka nevojë të ngutshme për pikë. Ballshiotët kanë 20 pikë dhe mbajnë vendin e parafundit, ndaj pritet një ndeshje tepër e fortë, e cila nuk do të respektojë renditjen e skuadrave respektive. Sa herë që Bylis ka pasur nevojë për pikë, fusha e tij është shndërruar në një ferr për kundërshtarët.
Partizani vjen nga fitorja kundër Tiranës në derbi, por do t’i mungojë Xhevahir Sukaj, autor i golit të parë, për shkak dëmtimi.
Tirana ka premtuar se do të bëjë kthesë me ndeshjen kundër Flamurtarit, në “Selman Stërmasi”. Kuqezinjtë vijnë nga barazimi me Tërbunin, por për ndeshjen me bardheblutë mund të kujtojnë se fituan dy javë më parë në “Selman Stërmasi”, për çerekfinalet e Kupës së Shqipërisë.
Kukësi pret Laçin, në një takim që vitet e fundit ka pasur shpesh tension e nerva, ndërsa Vllaznia pret Tërbunin. Shkodranët kanë shansin t’i largohen zonës së ftohtë, sidomos nëse Bylis nuk fiton me Partizanin.
Java e 25-të do të mbyllet me ndeshjen e orës 17:00 në Korçë, ku Skënderbeu pret Teutën.
Aktualisht, kampionët kryesojnë me katër pikë më tepër se Partizani.
JavaNews / Dritan Ikonomi
