Një ngjarje e rëndë ka tronditur qytetin e Katerinit në Greqi, ku një vajzë 14-vjeçare shqiptare ka ndërruar jetë pas një incidenti tragjik që ndodhi mbrëmjen e së dielës.
Sipas mediave greke, bëhet e ditur se e mitura u rrëzua nga një urë rreth 10 metra e lartë dhe pësoi dëmtime të rënda.
Pas incidentit, fillimisht ajo u transportua me urgjencë në spitalin e Katerinit, por për shkak të gjendjes së rëndë, mjekët vendosën ta dërgojnë në spitalin “G. Gennimatas” në Selanik dhe më pas në spitalin “Ippokrateio”.
Pavarësisht përpjekjeve të shumta të mjekëve për ta mbajtur në jetë, 14-vjeçarja ndërroi jetë mbrëmjen e së hënës.
Ndërkohë rrethanat e sakta të ngjarjes ende nuk janë zbardhur plotësisht, ndërsa autoritetet greke po hetojnë për të sqaruar plotësisht rastin në fjalë, teksa nuk është përjashtuar mundësia e një akti kriminal.
