Deputetja demokrate, Jozefina Topalli, kërkon nga kryetari i PDsë, Lulzim Basha, të ashpërsojë aksionin opozitar.
Në një intervistë për “Report TV”, ish-kryetarja e Parlamentit pranon se ka diferenca me kreun e opozitës, por kurrë nuk ngurron për të shprehur mendimet e saj brenda forcës politike. Topalli u qëndron deklaratave se opozita ka si opsion edhe lënien e mandateve, ndërkohë që shprehet e bindur se do të jetë në Parlamentin e vitit 2017.
Si e shihni gjithë këtë që po ndodh aktualisht në Parlament?
Nuk di nëse ekziston ndonjë vend tjetër i botës që të ketë dhe të trajtojë çështje të tilla, meqenëse nuk e ka në realitet një situatë këtillë, sepse është larg çdo imagjinate. Natyrisht që opozita ka bërë detyrën që duhet ta bëjë çdo opozitë e ndodhur në një situatë të paprecedentë. Nuk do thosha që është një bojkot i komisioneve parlamentare, është një gjest, është një thirrje. Unë do të thosha që është një ulërimë që duhet të ketë shoqëria shqiptare për të tundur Kryeministrin e vendit, që është fajtori i vetëm për situatën në të cilën gjendemi sot në Kuvend.
Gjithçka që po ndodh, duket se lidhet me rikthimin e deputetit Armando Prenga në Parlamentin e Shqipërisë. Është një situatë e papranueshme për Partinë Demokratike?
Këtu kanë hyrë në politikë njerëz të cilët mendojnë se, nëse ata zënë një karrige pushteti, cilado qoftë ajo karrige, kjo karrige i jep të drejtën për të vjedhur, për t’u pasuruar apo për të qëlluar me armë. Dhe ky është fundi. Këtu nuk jemi as në kushte politike, as në kushtet e një shoqërie që vepron normalisht. Këtu jemi në kushtet e një krize të forcave politike që sjellin të tillë njerëz pranë institucioneve, të një krize të Parlamentit, meqenëse një pjesë e rëndësishme e tij është e inkriminuar, por edhe e të gjitha institucioneve të tjera, përfshirë pushtetet lokale apo zyrat e rëndësishme të institucioneve të tjera të cilat drejtohen nga njerëz që kanë precedentë penalë. Si i vihet emri? Unë nuk di të gjej fjalën për t’ia vënë emrin një situate të tillë. Di që opozita duhet të bindë shoqërinë që të tundet dhe që të reagojë fuqishëm ndaj një fyerjeje, një poshtërimi që i bëhet çdo qytetari, çdo të riu, çdo gruaje, çdo burri me përfaqësimin që ata japin në Parlament.
Ju deklaruat, po ashtu si ish-kryeministri Berisha, që po rishikoni pozicionin tuaj në lidhje me mandatin në Parlament?
Është një dilemë që nuk është vetëm e imja, por është edhe e kolegëve të tjerë në fakt, që na ndjek gjatë gjithë kësaj periudhe. Shumë herë më ka ndodhur që t’i them vetes: Po unë, çfarë bëj këtu? Çfarë më lidh mua me këta njerëz? Unë, në fakt, mendoj se përballja është rruga më e mirë. Përballja është rruga më e rrezikshme, më e mirë. Lëshimi i mandateve është gjesti i fundit që një forcë politike mund të bëjë kur është në kushtet e zgjidhjeve ekstreme.
A keni parë rezultate nga protestat dhe a jeni kënaqur nga drejtimi që i është bërë PD-së në këto 3 vite, pasi u la nga zoti Berisha?
Sigurisht që me zotin Basha kam diferenca, kam pasur përherë diferenca, edhe mendimesh, për mënyrën sesi mund të menaxhosh një gjë, por kjo është një gjë normale në forcat politike. Ky është ndryshimi midis një force politike që lëviz brenda saj dhe forcave politike të ngurta apo të një natyre që kemi parë për gjysmë shekulli.
Cilat janë marrëdhëniet me kryetarin aktual të PDsë, Basha dhe a mendoni se do të vijoni të jeni në karrierën politike në Parlamentin e 2017?
Po, do të jem pas 2017, sepse Parlamenti dhe parlamentarizmi është pasioni im.
Protesta e 8 dhjetorit duhet pranuar që ishte një nga protestat më të mëdha që ka bërë Partia Demokratike.
Në gjithë jetën e saj në opozitë apo jo, jo vetëm protesta të jashtëzakonshme që elektrizonin sheshe të tëra, të mbushura plot. Në këtë aspekt, nuk ka pasur ndonjë gjë të re, të paprecedentë, përkundrazi, por është e vërtetë që reagimi i shoqërisë ka qenë i fortë në protestën e fundit që ka bërë Partia Demokratike. Por ndoshta këto protesta duhet të jenë më të shpeshta, më të forta, në çdo qytet, brenda shesheve të Tiranës, për të reaguar për çdo çështje. Ja sot po flitet për çështjen e pronave. Është shumë e mirë rruga institucionale, por a i dilet vetëm në rrugën institucionale? Për çështjen e ligjit të arsimit. Është një ndër ligjet që cenon interesat e fëmijëve. Po të shkosh p.sh., jo më tej se Italia, aty ka mekanizma të cilët fëmijëve të punëtorëve ua paguan bursën, shkollën, shteti apo sindikatat.
