Gjendet pas 4 orësh një vajzë 13-vjeçare që u denoncua nga familja si e rrëmbyer. Ngjarja u shënua rreth orës 15:15, ku vajza 13-vjeçare, sipas dëshmisë së nënës, u rrëmbye në rrugë nga dy persona me maska, teksa ishte në shoqërinë e motrës më të vogël, kur sapo kishin zbritur nga furgoni i shkollës. Por drejtori i Policisë së Tiranës, Rebani Jaupi teksa dha lajmin se vajza u gjet, tha se ajo nuk ishte rrëmbyer por se ishte me disa shoqe të saj duke pirë pije freskuese pranë një qendre tregtare.
Në një njoftim paraprak policia tha se “një person ende i paidentifikuar, ka marrë jashtë dëshirës në automjet një 13 vjeçare me inicialet S.B dhe ështê larguar”. Por nga deklarimet në polici pasi u gjet, vetë 13-vjeçarja tha se e gjitha u inskenua nga shokët dhe shokët e saj në formën e shakasë. Ajo ka deklaruar se ka ikur me dëshirë duke argumentuar se ‘prindërit nuk e linin të dilte’.
