Pamjet mahnitëse të thellësive të ujërave të Burimit të Mëmës në pikën turistike të Viroit në Gjirokastër dhe të shpellës së Skotinisë janë bërë publike për herë të parë nga shtatë polumbarë polakë të ardhur në Shqipëri në maj të këtij viti. Me një thellësi prej 60 m ‘Burimi i Mëmës’ është pjesë e legjendave të cilat e lidhin me shpellën e Skotinisë në zonën e Dropullit të Gjirokastrës dhe Syrin e Kaltër në Sarandë.
Burimet ujore të Skotinisë dhe Mëmës së Viroit, janë nga të vetmit burime natyrore të “tipit të sifonit”, pasi uji në të dyja rastet buron nga një thellësi afro 65 metra, del nga poshtë-lartë nëpërmjet një guve në formë hinke. Uji në të dyja burimet është i pastër dhe i kthjellët, aq sa njeriu nuk e ka të vështirë që në Mëmën e Viroit të dallojë një monedhë metalike deri në 25 metra thellësi. Hedhja e monedhave është traditë e hershme e banorëve të zonës.
Foto: Irena Stangierska
