Glenn Frey, njëri nga anëtarët themelues të bandës më të vjetër e shumë të njohur “Eagles”, ka vdekur në moshën 67 vjeçare pas një lufte të gjatë me problemet në stomak. Muzikanti, i cili shkroi dhe bashkë-shkroi këngët më të famshme të këtij grupi – duke përfshirë “Hotel California” dhe “Take It Easy” – ka vdekur në New York nga komplikimet që rrjedhin nga artriti reumatoid, kolita ulcerative akute dhe pneumonia, raporton The Telegraph.
Një deklaratë e lëshuar në emër të familjes së tij dhe anëtarëve të tjerë të grupit, e cila konfirmoi vdekjen e tij, fillimisht është raportuar nga TMZ. “Fjalët nuk mund ta përshkruajnë keqardhjen tonë, as dashurinë dhe respektin tonë për të gjitha ato që ai ka dhënë për ne”, thuhej në këtë deklaratë. Frey ka shkruar dhe bashkë-shkruar shumë këngë të grupit së bashku me Don Henley.
“Ai ishte si një vëlla për mua; ne ishim familje, dhe si në shumë familje, ekzistojnë disa mosfunksionime”, ka thënë Henley në një deklaratë. “Por, lidhjen të cilën e kemi krijuar 45 vjet më parë asnjëherë nuk e kemi thyer, edhe gjatë 14 vjetëve që Eagles ishte shpërbërë.
Frey ishte anëtarë i Eagles dhe ka performuar me grupin në koncertet e fundit, duke përfshirë turneun “History Of The Eagles” i cili është mbajtur në muajin korrik të vitit të kaluar.
Ai iu nënshtrua një operacioni në zorrë, nëntorin e kaluar, duke detyruar bendin të mos marrë pjesë në një ceremoni, e cila është mbajtur muajin e kaluar në qendrën Kennedy në Washington dhe në të cilën do të nderoheshin së bashku me artistët e tjerë. Mjekët thanë se ky operacion do të kërkojë një periudhë të gjatë për rikuperim.
Frey kishte probleme me zorrë, pasi që ka konsumuar në masë të madhe alkohol dhe drogë kur grupi ishte në kulmin e popullaritetit në vitet e ’70-a.
I rritur në Michigan, ai formoi grupin “Eagles” së bashku me Henleyn, Randy Meisner dhe Bernie Leadon në vitin 1971 pas kuartetit që ka vepruar si mbështetje e muzikantëve për Linda Ronstadt në turne.
