Ministri i Shëndetësisë, Ilir Beqaj, mori pjesë sot në konferëncën “Financimi spitalor sipas modelit DRG”, nga ku nënvizoi rëndësinë e financimit publik në shëndetësi.
Gjatë fjalës së tij ai tha se financimi mbetet ende problem në sistemin e shëndetësisë.
“Financimi mbetet ende problem në sistemin e shëndetësisë. Financimin publik ne e kemi më poshtë se OECD. Ndaj është shumë i rëndësishëm rialokimi i burimeve. Megjithatë, viti 2015 ishte viti i parë që rreth 54% i financimeve në shëndetësi kanë qënë publike. Në dy vite ne kemi mundur të ulim shpenzimet e qytetarëve për barnat. Por, ne gjithashtu do të financojmë dhe fuqizojmë Qëndrën e Traumës e do të optimizojmë shpenzimet aktuale të shëndetësisë. Pra, me të njejtat fonde do të kemi mundësi të bëjme më shumë”, u shpreh Beqaj.
Beqaj prezantoi sistemin e ri të financimit të spitaleve, i cili do të financohet nga marrëveshja “Huaja për Zhvillim” e qeverisë Italiane.
Konferenca është pjesë e projektit IHIS, që synon ruajtjen dhe përmirësimin e shëndetit të popullatës shqiptare duke rritur efikasitetin, maksimizimin e produktivitetit në prodhimin e shërbimeve përmes futjes së DRG.
Në fjalën e mbajtur kreu i shëndetësisë tha se vendi ynë është i fundit për sa i përket financimit në shëndetësi. “Ne jemi të angazhuar për financimin e spitaleve edhe pse kjo pjesë mbetet ende problem, pasi na nevojitet më shumë financim. Në këto dy vite kemi ndërruar tendencën, Në shumë vite më shumë se gjysma e shpenzimeve kanë qenë jo publike, ndërsa në vitin 2015 më shumë se gjysma e shpenzimeve janë publike”, sqaroi ai.
Më tej ministri Beqaj tha se ka gati planin për të nisur financimin prej 5 milione euro për sistemin parësor dhe 5 milione euro për Spitalin e Traumës.
Po ashtu, financimi i shëndetësisë vjen në kuadër të mbulimit universal, nënvizoi ministri.
