Partia Demokratike i është rikthyer sërish akuzave në drejtim të kryeministrit Edi Rama, për HEC-in e Skavicës.
Nga selia blu, Grida Duma deklaroi projekti më i madh energjetik në vend, është gjithashtu një nga pazaret dhe aktet korruptive më të mëdha të Edi Ramës.
Sekretarja për Marrëdhëniet me Publikun, Grida Duma tha sot se Partia Demokratike e denoncoi këtë aferë të Ramës, ditën kur ai shkoi në Turqi dhe bëri bisedimet private, sekrete sipas selisë blu.
“Atë kohë, qeveria e mohoi, por më vonë, Arben Ahmetaj e pranoi në ekran aferën e Ramës, me krenari madje si bum investimi. Arben Ahmetaj në ekran; Janë disa pyetje që kanë sot qytetarët dhe opinioni publik; Kur qeveria e mori vendimin me 23 dhjetor, t’ia japë Skavicën firmës turke, pa garë, pa transparencë, përse e mbajti të fshehur dhe e shpalli me 7 janar? Kush janë zyrtarët e tjerë të qeverisë, që kanë vijuar negociatat sekrete të Edi Ramës me kompaninë turke? Përse vendimin e shpall kompania turke, përpara se sa ta bëjë publike qeveria shqiptare? Dhe, a është firma e përzgjedhur nga Edi Rama, në listën e zezë për shkak të aktiviteteve të saj të dyshimta, e shpallur si e tillë nga autoritetet turke dhe ndërkombëtare?”, ka thënë ajo.
Sipas Dumës, Partia Demokratike do t’i shkoj deri në fund çështjes dhe do të bëjë transparencë për një nga pazaret më të mëdha siç e cilëson, të Edi Ramës me pasurinë e vendit. “Shqiptarët meritojnë transparencë, dhe Edi Ramës e pazareve të tij kanë për ti dhënë përgjigjen e merituar”, përfundoi Duma.
