Kryebashkiakja e Durrësit, njëkohësisht drejtuese politike e PS në të njëjtin qark, Emirjana Sako ka bërë me dije se Partia Socialiste synon të marrë 9 mandate në zgjedhjet e 11 majit, nga 14 që janë në total.
E ftuar në studio e emisionit “Ngjarja Kryesore” në RTSH, Sako tha se për të arritur 9 mandate në qarkun e Durrësit, nevojitet që PS të marrë 18 mijë vota më shumë se në zgjedhjet e vitit 2021, kur në këtë qark ishte në listën e kandidatëve për deputetë edhe kryeministri Edi Rama.
Për të arritur këtë numër votash, Sako u shpreh se përveç mbështetjes brenda vendit, PS shpreson për një votëbesim të gjerë edhe nga diaspora, teksa shtoi se kjo forcë politike gëzon një mbështetje e 60% të atyre që do të votojnë në këtë qark.
“Ne kemi një listë kandiatësh shumë konkurruese, kemi figura që kanë eksperiencën e të qenit në parlament, qoftë edhe pjesë e fushatës. Kemi edhe figura që kanë ardhur nga propozimet e strukturave të PS që kanë patur rezultate pozitive, kemi figura që vijnë nga platforma “Deputeti që duam”, por kemi zgjedhur edhe profesionistë të lirë, individë që vijnë nga bota e sipërmarrjes dhe biznesit. Ne synojmë 9 mandate dhe kjo kërkon që të kemi rritje të numrit të votave krahasuar me vitin 2021. Ne kemi bërë kalkulimet dhe duhen rreth 18 mijë vota plus nga viti 2021 dhe do i kemi nga votuesit që janë në Shqipëri, por kemi edhe një potencial shumë të madhe me votën e diasporës, ku kemi besim se do kemi një mbështetje diku te 60% të atyre që do votojnë për qarkun e Durrësit”, u shpreh Sako.
